Link açıqlığı

Saatnıñ esas haberi

Faaliyetçi: Mustafayev ve Smailovnıñ yaqalanması – «Qırım birdemligi»ne tazyiqtır


Faaliyetçi Dilâver Memetov
Faaliyetçi Dilâver Memetov

Qırım faaliyetçileri Server Mustafayev ve Edem Smailovda yapılğan tintüvler ve olarnıñ yaqalanması – «Qırım birdemligi»ne tazyiq ve «qırımtatar halqınıñ yardımlaşmasını bastırmaq» teşebbüsidir. Bunı Qırım.Aqiqat Radiosı efirinde «Qırım birdemligi»niñ koordinatorı Dilâver Memetov bildirdi.

Faaliyetçi: «Er kes içün numüne olğan bu insanlar, öz halqına ve cemiyetke faydalı olmaq içün bütün ömürlerini bere ediler. Bugün ise bu faaliyetçiler ocağına ve olarnıñ bu faaliyetine terroristik ya da cemiyet içün telükeli deyler. Biz bunıñ «Qırım birdemligine nevbetteki tazyiq olğanını añlaymız, çünki Server Mustafayev onıñ koordinatorı ola. Onan ğayrı, bu, yardımlaşmamıznı bastırmaq maqsadınen yapılğan bütün halqqa tazyiqtır», – dep qayd etti.

Mayıs 21-de Rusiye telükesizlik hadimleri Bağçasarayda «Qırım birdemligi» birleşmesiniñ koordinatorı Server Mustafayev ve Bağçasaray rayonınıñ Topçıköy (Dolinnoye) köyünde Edem Smailovnıñ evlerini tintti.

Azatlıq Radiosı muhbiriniñ malümatına köre, Mustafayevni «Hizb ut-Tahrir işi» boyunca yaqaladılar. Onı mahkemege qadar vaqtınca tutuluv izolâtorında apis etecekler. Mahkemede ise oña sıñırlav tedbiri saylana bilecek.​

Rusiye FSBsi, Rusiye ve ilhaq etilgen yarımadada yasaq etilgen «Hizb ut-Tahrir» teşkilâtında iştirak etkenlerinden şübhe etilgen eki kişiniñ Qırımda yaqalanğanını bildirdi.

İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.

«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.

«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar olğanını ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri taqip etilgenini qayd eteler. Halqara uquq, işğal etilgen territoriyada işğalci devletniñ qanunlarını tatbiq etmekni yasaq ete.

XS
SM
MD
LG