Büyük Britaniya tış işleri naziri Boris Conson, AQŞ tarafından Rusiyege qarşı tatbiq etilgen sanktsiyalarnı tesirli saya ve ABden çıqqan soñ London tarafından da tıpqı böyle sanktsiyalarnıñ tatbiq ete bilecegini ayta. Bunı Bloomberg bildire.
Onıñ aytqanına köre, şimdilik Büyük Britaniya böyle adımlarnı Avropa Birligi ile uzlarştırmaq kerek, lâkin «brekzit»ten soñ Londonda daa sert munasebet köstermege imkân olacaq.
Conson: «İhtimal ile qanunsız yolnen elde etilgen zenginlikleri olğan Putinge yaqın adamlarğa qarşı Büyük Britaniya ne yapa bilecek, degen daa keniş mıqyaslı bir sual bar», – dedi.
Bunıñ arfesinde Britaniya parlamentindeki Cemaatlar odasınıñ halqara işler komiteti «Moskvanıñ altını: Büyük Britaniyada Rusiyeniñ korruptsiyası» maruzasını neşir etti. Onıñ muellifleri, Rusiyeden kelgen «kirli» paralar Birleşken qırallıqnıñ tış siyasetine zarar ketireler, dep iddia ettiler. Olar ukümetni, «Putinniñ yaqın etrafındaki kleptokratlar ve insan aqlarını bozğanlar»ğa qarşı qoşma sanktsiyalarnı qabul etmege ve bunıñ kibi de dünya bazarında Rusiyege ait senetlerniñ yerleştirilmesini blok etmege davet ettiler.
Aprel 6-da Qoşma Ştatları, Rusiyeniñ Amerikadaki saylavlarğa qarışması, Moskva tarafından Ukrainanıñ şarqındaki ve Suriyedeki arbiy çatışmalarğa qol tutulması ve em de Qırımnıñ zapt etilmesine cevap olaraq Rusiyeniñ 24 vatandaşı ve 14 şirketine qarşı sanktsiyalar tadbiq etti. AQŞnıñ ilân etkenine köre, cedvelge «Putinniñ rejiminden kâr körgen ya da Rusiyeniñ mahv etici areketlerinde anahtar rolüni oynağan» kişiler kirdi. Sanktsiyalar, AQŞta sanktsion cedvelge kirsetilgen şahıslarğa ait aktivlerniñ tevqif etilmesini ve Amerika vatandaşları ve şirketlerine olarnen emekdaşlıq yapmaqnıñ yasaq etilmesini tayin eteler.
Mayısta Avropa Birligi ilhaq etilgen Qırımda ve Aqyarda Rusiye prezident saylavınıñ teşkil etilmesine alâqası olğan beş kişige qarşı sanktsiyalar tatbiq etti.
