Link açıqlığı

Saatnıñ esas haberi

Qırımtatar Milliy Meclisiniñ reisi Refat Çubarov, Ukraina ukümeti ve dünya toplulığını, Qırımnıñ azat etilmesi içün Rusiyege qarşı «daa tesirli çareler»ni körmege davet etti.

Bu hususta Meclis reisiniñ Rusiye tarafından ilhaq etilgen yarımadada mayıs 21-de olıp keçken vaqialarğa dair beyanatında aytıla.

Beyanatnıñ metninde: «Biz Rusiyeden Qırımnıñ qanunsız ilhaqını deral toqtatmaqnı ve işğal etilgen yarımadanı azat etmekni talap etemiz. Biz Ukraina ve dünya toplulığını, Qırımnıñ azat etilmesi içün Rusiyege qarşı daa tesirli çarelerni körmege davet etemiz, çünki yarımadanıñ işğali, insan aqları, halqara cinaiy ve halqara gumanitar uquqnıñ bozuluvı içün ilk sebebi ola», – denile.

Çubarov, «yarımadanıñ azat etilmesi ne qadar tez olsa, Moskvanıñ bu uquqiy ve maneviy zorbalığı da o qadar tez soñuna yetecek.

Mayıs 21-de Rusiye telükesizlik hadimleri Bağçasarayda «Qırım birdemligi» birleşmesiniñ koordinatorı Server Mustafayev ve Bağçasaray rayonınıñ Topçıköy (Dolinnoye) köyünde Edem Smailovnıñ evlerini tintti.

Daa soñra Rusiye FSBsi, Rusiye ve ilhaq etilgen yarımadada yasaq etilgen «Hizb ut-Tahrir» teşkilâtında iştirak etkenlerinden şübhe etilgen eki kişiniñ Qırımda yaqalanğanını bildirdi.

Bunıñ kibi de mayıs 21-de Rusiyeniñ mahsus hizmeti, Qırımda, sanki, qırımtatar halqınıñ liderleri tarafından SBUnıñ qol tutuvı ile meydanğa ketirilgen «ekstremist gruppası»nıñ areketi faş etildi, dep bildirdi.

Buña cevaben Ukraina telükesizlik hizmeti (SBU), Rusiye FSBsiniñ, ilhaq etilgen Qırımda Ukrainanıñ mahsus hizmetleri yardımınen «ekstremist gruppasınıñ meydanğa ketirilmesi» aqqında malümatı kerçekke uymay, dep bildirdi.

İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.

XS
SM
MD
LG