Rusiye uquqqoruyıcı organları ilhaq etilgen Qırımda 17 faaliyetçiniñ alıp qaçılmasını tahqiq etmek içün areket etmey. Bunı Qırım.Aqiqat Radiosı efirinde Qırımtatar Milliy Meclisiniñ azası, Qırımtatar halqınıñ aqlarını qorçalav komitetiniñ reisi Eskender Bariyev bildirdi.
Bariyev: «Bizim malümatımızğa köre, bugünge qadar endi 17 kişi alıp qaçıldı. Olarğa dair iç bir malümat yoq. Amelde bu adiseler tahqiq etilmey. İşler sözde toqtatılmadı, amma bunıñnen beraber iç bir faal areketler yapılmay. Ervin İbragimovğa dair iç bir aydılanuv körmeymiz. Menim fikrimce, bu, işke işğalci ukümetiniñ telükesizlik strukturalarınıñ vekilleri ya da «özüni mudafaa» dep adlandırılğanlarnıñ alâqası olğanı ile bağlı. Öz taraftan biz dünya toplulığınıñ diqqatını çekmek ve Rusiyege tazyiq etmek kerekmiz. Er bir ğayıp olğan insan içün mesüliyetli olğan odır», – dep qayd etti.
2016 senesiniñ mayısında Bağçasarayda belli olmağan şahıslar Dünya Qırımtatar Kongressi icra komitetiniñ azası Ervin İbragimovnı alıp qaçtılar. Videoközetüv kamerası, Rusiye yol inspektorları uniformasını kiygen eki kişiniñ, İbragimovnıñ maşinasını toqtatıp, özüni öz mikroavtobuslarına zornen kirsetkenlerini qayd etti.
Qırım insan aqlarını qorçalav gruppası, bu alıp qaçuvnıñ Rusiye ukümeti ya da onıñ kontroli altında olğan paramilitar gruppalar tarafından kerçekleştirilgenini tahmin ete.
