Ukraina İnformatsion siyaseti nazirligi mayıs 18 Qırımtatar halqını sürgün etüv qurbanlarını hatırlama kününe bağışlap kampaniyanı başlata. Bu hususta muessiseniñ bildirüvinde aytıla.
Muessiseniñ malümatına köre, kampaniya üç videorolik ile taqdim etile. Olarnı içtimaiy reklama sıfatında milliy telekanallar ve bunıñ kibi de Ukrainanıñ bütün territoriyasında olacaq bordlar ve sitilaytlarda aylandırılmaları içün yerleştirecekler.
Ukraina informatsion naziriniñ birinci muavini Emine Ceppar: «Mayıs 18-ni qayd etmek – bu, sadece sürgün etüv qurbanlarını hatılamaq degil, bu, bugün de devam etken küreşniñ bir qısmıdır. Şimdi biz, asılında, yarımadadan tamır halqınıñ sürgün etilmesi ve Qırımnıñ qırımtatarlardan temizlenmesi olğan 1944 senesindeki vaqialarnıñ tekrarlanğanını köremiz», – dedi.
Mayıs 18-de Qırımtatar halqını sürgün etüv qurbanlarını hatırlama kününe bağışlap, Kyivde Sofiyskaya meydanında devletniñ üst seviyeli rehberleriniñ iştiraki ile rekviyem aqşamı keçirilecek. Ondan ğayrı, mayıs 15-18-de Ukrainanıñ bütün territoriyasında türlü forumlar, konferentsiyalar, sergiler ve perfomanslar keçecek.
Mayıs 18 saat 12-de sürgün etüv qurbanlarınıñ hatırası umum Ukraina süküt daqqası ile qayd etilecek. Aydavcılarnı bu esnada, qırımtatar halqı ile birdemligini kösterip, öz avtomobillerini toqtatmaq ve klaksonnı çaldırmaq davet eteler.
Qırımdan qırımtatar halqını sürgün etüv qurbanlarını hatırlama künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
