Qırımtatar Milliy Meclisi reisiniñ muavinleri Ahtem Çiygoz ve İlmi Umerov Vaşingtonğa keldi. Anda olar AQŞ prezidenti Donald Tramp memuriyetiniñ vekilleri ile körüşti. Bunı mayıs 16-da özüniñ Facebooktaki saifesinde Umerov yazdı.
Bildirüvde: «Bu körüşüv esnasında Şarqiy Avropa, Ukraina ve işğal etilgen Qırımdaki al-azırdaki vaziyet muzakere etildi», – denile.
Ondan ğayrı, Umerovnıñ bildirgenine köre, senator Riçard Durbinniñ (İllinoys ştatı) vekilinen körüşüv yapıldı.
Bildirilgenine köre, Çiygoz ve Umerov, BMTniñ Halqara mahkemesinde Rusiyege qarşı davada Ukrainanıñ menfaatlarını temsil etken Covington and Burling, LLP Amerika uquqiy şirketiniñ ofisini ziyaret ettiler. Bu davada mahkemeniñ qararı çıqarılıp, oña binaen Rusiye Qırımda Meclisniñ faaliyetini ğayrıdan başlatmaq mecbur.
Çiygoz ve Umerovnıñ iştirlaki ile Makkeyn İnsitutında «Qırım, ilhaqtan dört yıl keçken soñ» tedbiri keçti. Onıñ esnasında Meclis liderleri toplaşqanlarğa Qırımnıñ ilhaqından soñ olıp keçken adiseler aqqında ikâye ettiler.
Daa evel AQŞtaki Ukraina elçiligi, Çiygoz ve Umerovnıñ Vaşingtonğa kelgenlerini bildirdi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
