Gazze şeritindeki biñlerce filistinli, mayıs 14 künü narazılıq tedbirleriniñ onlarca iştirakçisiniñ cenazelerinde iştirak etti. Soñki malümatlarğa köre, 62 elâk olğan kişi aqqında belli.
BMT Telükesizlik Şurası salı künü fevqulâde oturışuvda Gazze şeritindeki vaziyetni muzakere etti. Bunıñ arfesinde anda israilliler ile filistinliler arasında şiddetli çatışmalar olıp keçti. Amerika Sesi, soñki beş yıl içinde böyle bir qan tökülmesi olmadı, dep qayd ete.
Oturışuvnı BMTniñ Yaqın Şarqtaki uzlaşuv boyunca mahsus temsilcisi Nikolay Mladenov açtı. O, elâk olğanlarnıñ aileleri ve yaqınlarına taziye bildirip, dünya toplulığı İsrail ile sıñırda olıp keçkenlerni «eñ qatiy şekilde taqbih ete», dep, ayrıca qayd etti.
Mladenov: «Türlü menbalarğa binaen, tünevin (mayıs 14 künü) eñ azından 60 kişi ve şu cumleden 6 bala öldürildi, ve 1300-den ziyade kişi yaralandı… Bir İsrail askeri yaralandı», – dedi, ve bu sene mart 30-da narazılıqlarnıñ başlanmasından berli bu «eñ qanlı kün edi», dep ilâve etti.
BMTniñ insan aqları boyunca Yuqarı komissarınıñ idaresi: «Öyle bir teessurat peyda ola ki, sıñırdan aman-aman 700 metr uzaqlıqta er kim: qadınlar, balalar, jurnalistler, acele qarşılık kösterüv hizmetleriniñ hadimleri ve tesadüven keçkenler öldürilmek ya da yaralanmaq mümkünler», – dep bildirdi.
