Türkiyedeki Ukraina elçiliginiñ vekilleri, Ankarada mayıs 13-te qırımtatar halqınıñ genotsidi qurbanlarınıñ hatırasına bağışlanğan mitinginde iştirak ettiler. Elçilikniñ Twitterdeki resmiy saifesinde bildirilgenine köre, diplomatlar birleşmege ve «Rusiyege repressiv usullarnı cezasız qullanmaq içün imkân bermemege» davet ettiler.
Bildirüvde: «Bugünki miting – 1944 senesinde elâk olğan ve esir etilgenlerniñ hatırasına ürmettir. Sovet ukümetiniñ qorqunçlı cinayeti olğan qırımtatarlarnıñ sürgün etilmesini beraber hatırlaymız. Bundan soñ Rusiyege repressiv usullarnı cezasız qullanmaqnı iç bir vaqıt bermeycekmiz», – denile.
Türkiyedeki Ukrainanıñ elçisi Andriy Sıbiha mitingde Tış işleri naziri Pavlo Klimkinniñ muracaatını oqudı.
Sıbiha Twitterde: «Sürgün etilüvniñ 74-nci yıllığına bağışlanğan qırımtatarlarnıñ mitinginde Pavlo Klimkinniñ muracaatını oqudım. Qırımtatar qardaşlarımız ile umumiy ağrımıznı paylaşamız. Sürgün etilüv halqara uquq tarafından genotsid olaraq tanılmalı. Umumiy ğalebe içün çalışamız», – dep yazdı.
Qırımtatar Milliy Meclisi reisiniñ malümatına köre, Ankarada mayıs 13-te qararnen 5-6 biñ kişiniñ toplanması planlaştırıla. İstanbulda miting mayıs 20-de Rusiye baş konsullığı qarşısında yapılacaq.
Daa evel Çubarov, qırımtatarlarnı ilhaq etilgen Qırımda mayıs 18-de, Qırımtatar halqını Qırımdan sürgün etüv qurbanlarını hatırlama kününde umum Ukraina sükünet daqqasına qoşulmağa davet etti.
O, Ukrainanıñ qıtadaki qısmında, qırımtatar halqını sürgün etüv qurbanlarınıñ hatırasına matem tedbirleri Herson vilâyeti, Geniçesk rayonı, Novoalekseyevka, Odesa, Lviv ve tedbirler ukrain ve yeudi cemaatlarınıñ iştiraki ile Holokost muzeyinde yapılacaq Dneprde keçecekler, dep qayd etti.
Qırımdan qırımtatar halqını sürgün etüv qurbanlarını hatırlama künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
