Kyivdeki «Qırım evi»nde mayıs 15-te qırımtatarlarnıñ sürgün etilmesiniñ yıllığına bağışlanğan zemaneviy sanat sergisi çalışıp başlaycaq. Bu aqta, «Qırım evi»niñ Facebooktaki saifesinde bildirile.
Bildirüvde: «Leyhanı Lviv ressamı ve performeri Vlodko Kaufman, qırımtatar keramisti Rustem Skibin, qırımtatar rejissörları, operatorları ve fotograflarnıñ taqımı meydanğa ketireler», – denile.
Tedbirniñ kuratorı – «Qırım evi»niñ programmalar direktorı Alim Aliyev.
Açılışı mayıs 15, saat 19:00-ğa planlaştırıldı.
Daa evel Çubarov, qırımtatarlarnı ilhaq etilgen Qırımda mayıs 18-de, Qırımtatar halqını Qırımdan sürgün etüv qurbanlarını hatırlama kününde umum Ukraina sükünet daqqasına qoşulmağa davet etti.
O, Ukrainanıñ qıtadaki qısmında, qırımtatar halqını sürgün etüv qurbanlarınıñ hatırasına matem tedbirleri Herson vilâyeti, Geniçesk rayonı, Novoalekseyevka, Odesa, Lviv ve tedbirler ukrain ve yeudi cemaatlarınıñ iştiraki ile Holokost muzeyinde yapılacaq Dneprde keçecekler, dep qayd etti.
Qırımdan qırımtatar halqını sürgün etüv qurbanlarını hatırlama künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
