Qırımtatar Milliy Meclisiniñ reisi, Ukraina halq deputatı Refat Çubarov, Ankaradaki Anadolu meydanında qırımtatar halqına qarşı yapılğan genotsidniñ qurbanları hatırasına ötkerilgen matem mitingi iştirakçilerine muracaat etti. Videomuracaatını o, özüniñ Facebooktaki saifeside derc etti.
Çubarov, qırımtatarlarnıñ 1944 senesi faciasınıñ qurbalarını iç bir vaqıt unutmaycaqlarını qayd etti.
Çubarov: «Rusiye Vatanımıznı bir kere daa işğal etti… Halqımız Rusiyeden çoq ağır zulümler kördi. 18-nci mayıs 1944 – bu zulümlerniñ eñ büyügidir. Halqımız Qırımnıñ işğaline qarşı çıqtı, asla qabul etmedi ve iç bir vaqıt qabul etmeycek. Lâkin işğalniñ başından berli, dört senedir, Qırımda yaşağan halqımızğa basqılar, zulümler künden-künge arttı. Zan etemiz ki, kelecekte daa artacaq… İşğalge qarşı çıqqan qaraşlarımızdan öldürilgenler oldı. Qaçırılıp, ğayıp etilgenler bar. 67 vatandaşımız Rusiye türmelerinde tutula. Er afta bir qaç qırımtatarnıñ evi basıla», – dedi.
Halq deputatı, dünya toplulığı: BMT, Avropa parlamenti, bir çoq devlet – Qırımnıñ ilhaqını taqbih etti ve Rusiyege qarşı iqtisadiy sanktsiyalar qullandılar, dep qayd etti. Ondan ğayrı Çubarov Türkiye ukümetine, Ukrainağa ait yarımadanıñ ilhaqını tanımağan içün minnetdarlığını bildirdi. Onıñ aytqanına köre, Türkiyede yaşağan qırımtatarlar endi 4 seneden berli Ankarada matem mitinglerini keçire.
Çubarov: «Halqımızğa yapılğan genotsidni asla unutmaycaqmız. Genotsidni yapqanlar ve bugün Qırımda olğan cinayetçiler muaqqaq mahkeme ögünde esap berip, çezalarını çekecekler. Yaşasın Türkiye Cumhuriyeti, yaşasın Ukraina devleti, yaşasın Qırım, yaşasın qırımtatar milleti», – dep beyan etti.
Qırımtatar Milliy Meclisi reisiniñ malümatına köre, Ankarada mayıs 13-te qararnen 5-6 biñ kişiniñ toplanması planlaştırıla. İstanbulda miting mayıs 20-de Rusiye baş konsullığı qarşısında yapılacaq.
Daa evel Çubarov, qırımtatarlarnı ilhaq etilgen Qırımda mayıs 18-de, Qırımtatar halqını Qırımdan sürgün etüv qurbanlarını hatırlama kününde umum Ukraina sükünet daqqasına qoşulmağa davet etti.
O, Ukrainanıñ qıtadaki qısmında, qırımtatar halqını sürgün etüv qurbanlarınıñ hatırasına matem tedbirleri Herson vilâyeti, Geniçesk rayonı, Novoalekseyevka, Odesa, Lviv ve tedbirler ukrain ve yeudi cemaatlarınıñ iştiraki ile Holokost muzeyinde yapılacaq Dneprde keçecekler, dep qayd etti.
Qırımdan qırımtatar halqını sürgün etüv qurbanlarını hatırlama künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
