Rusiye Tış işleri nazirligi Rusiye vatandaşlarına, mayıs 13-te Qırımtatar Milliy Meclisi tarafından teşkil etilgen matem mitingi keçecek Ankaradaki Anadolu meydanına kelmemege tevsiye ete. Rusiyedeniñ haber agentlikleri bunı, Rusiye TİNiniñ vaziyet ve buhran merkezine atıfta bulunıp, bildireler.
Moskvada, Türkiyeniñ paytahtında planlaştırılğan toplaşuvnı «Rusiyege qarşı» doğrultılğan, dep sayalar.
Bildirüvde: «Rusiye vatandaşlarına bu meydannı ve onıñ yanındaki rayonlarnı ziyaret etüvden vazgeçmege tevsiye etile», – denile.
Türkiyedeki Ankara ve İstanbulda, munasip şekilde mayısnıñ 13 ve 20 künlerinde qırımtatar halqınıñ genotsidi qurbanlarınıñ hatırasına mitingler keçecek.
Qırımtatar Milliy Meclisiniñ reisi Refat Çubarovnıñ malümatına köre, Ankarada mayıs 13-te qararnen 5-6 biñ kişiniñ toplanması planlaştırıla. İstanbulda miting mayıs 20-de Rusiye baş konsullığı qarşısında yapılacaq.
Daa evel Çubarov, qırımtatarlarnı ilhaq etilgen Qırımda mayıs 18-de, Qırımtatar halqını Qırımdan sürgün etüv qurbanlarını hatırlama kününde umum Ukraina sükünet daqqasına qoşulmağa davet etti.
O, Ukrainanıñ qıtadaki qısmında, qırımtatar halqını sürgün etüv qurbanlarınıñ hatırasına matem tedbirleri Herson vilâyeti, Geniçesk rayonı, Novoalekseyevka, Odesa, Lviv ve tedbirler ukrain ve yeudi cemaatlarınıñ iştiraki ile Holokost muzeyinde yapılacaq Dneprde keçecekler, dep qayd etti.
Qırımdan qırımtatar halqını sürgün etüv qurbanlarını hatırlama künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
