Rusiye mayıs 14-ke qadar BMTniñ Halqara mahkemesine, mahkeme tarafından berilgen ara emirniñ ilhaq etilgen Qırımda Qırımtatar Milliy Meclisiniñ faaliyetine izinniñ berilmesi ve yarımadada ukrain tilinde tasil almasına irişüvniñ temin etilmesi qısmında yerine ketirilmesine dair añlatmalarını taqdim etmek kerek.
Bunı «5-nci kanal» efirinde Ukraina tış işleri naziriniñ muavini Olena Zerkal bildirdi.
«Bizim (BMT makemesi tarafından berilgen – QA) bu emirniñ izalanmana ve yerine ketirilmesi boyunca neler yapılğanına dair malümatnıñ talap etkenimizge qarşı rusiyeliler mayıs 14-ke qadar yazılı şekilde cevap bermek kerekler. Bundan soñ mahkeme qaysı bir protsedura boyunca areket etecegine – ondan soñ yapılacağını tayin etmek içün ağzaviy denilgen diñlemelerniñ olacağı ya da olmaycağına dair qarar berecek», – dedi o.
O, mahkemeniñ Rusiyege qarşı açılğan iş boyunca bergen ara emri Rusiye tarafından yerine ketirilmegeni, Ukrainanıñ BMTniñ Halqara mahkemesine muracaat etkenine sebep oldı, dep hatırlattı.
Aprel 24-te Ukrainanıñ, Rusiyege qarşı 2017 senesinde qabul etilgen muvaqqat çareler körüv emrine binaen onıñ Qırımtatar Milliy Meclisini yasaq etkenini lâğu etmek kerek olğanını tasdiqlamaq ricası ile BMTniñ Halqara mahkemesine muracaat etkeni belli oldı.
Ondan ğayrı Ukraina Tış işleri nazirliginde, BMTniñ Halqara mahkemesi tarafından berilgen emir Rusiyeniñ Qırım sakinleri içün ukrain tilinde tasilniñ alınmasına irişüvni temin etmek mecbur olğanını tayin ete, ve eki tarafnı da, em Qırım Muhtar Cumhuriyetiniñ territoriyasında diskriminatsion areketlerni yapuv, em de Ukrainanıñ şarqında terrorizm aktlarına qol tutuv kibi mahkemedeki davanı keskinleştire bilecek çareler körmesinden vazgeçmege davet ete, dep hatırlattılar.
Ukraina Rusiyeniñ Halqara mahkeme tarafından qabul etilgen muvaqqat çarelerniñ tatbiq etilmesi boyunca qararnıñ izalanmasına yanaşuvından dolayı nevbetteki kere teren endişesini ifade etti ve, Rusiyeniñ areketleri halqara uquqnıñ normalarına uymaylar, dep bildirdi.
2017 senesinde Ukraina BMTniñ Halqara mahkemesinde Rusiyege qarşı dava açtı. Onıñ maqsadı, Ukrainada terrorizm aktlarına para ayırğanı ve qol tutqanı, em de Ukrainağa qarşı tecavuz aktlarınıñ yapılması çerçivesnde ırqiy diskriminatsiya aktlarında iştirak etkeni içün Rusiyeni mesüliyetke çekmektir.
Ondan ğayrı Ukraina, vaziyetniñ acele areketler talap etkenini köz ögünde tutıp, BMTniñ Halqara mahkemesine, munasip muvaqqat çarelerni qabul etmek ricası ile muracaat yolladı. 2017 senesi aprel 19-da mahkeme, Ukrainanıñ talabına cevaben, Rusiyege qarşı muvaqqat çarelerni körmek qararını aldı.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
