Kremlniñ kontroli altında olğan Qırım Yuqarı mahkemesi, imaye tarafından «Veciye Kaşka işi» figurantları Bekir Degermenci, Asan Çapuh, Kâzim Ametov ve Rusilan Trubaçqa tahqiqat izolâtorında tutuluv muddetiniñ uzatılmasında qarşı berilgen apellâtsiyanı red etti.
Tahqiqat, qabaatlanğanlar qaçmaq, şaatlarğa tesir etmek, delillerni yoq etmek mümkünler, dep iddia ete edi. İmaye, birinci maqam mahkemesi iş figurantlarınıñ musbet hasiyetnameleri, sağlıq vaziyeti, yaşı ve turğun içtimaiy alâqalarını köz ögüne almağanına işaret etip, sıñırlav tedbirini daa yımşaq şekline deñiştirmekni istey edi.
Bekir Degermenci, munaqaşalarda çıqışta bulunırken: «Men, qararnıñ nasıl olacağını evelden bilem. Arqadaşım Asan Çapuh aytqan kibi, bu bir farstır – artıq bugün bizge kene muddetni uzatalar. Biz cemiyet içün iç bir telüke teşkil etmeymiz. Advokatım, tahqiqat izolâtorında tutulamaycağımnı köstergen malümatnameni taqdim etti. Siz onı baqmaqnı red ettiñiz. Men bu yarım yıl içinde o qadar çoq bozuluvlar kördim ki, iç olmadı, bir kişi añlasın dep nasıl añlatmaq keregimni bilmeyim. Sizge bir ölüm azlıq etemi?», – dedi.
Diger şübheliler sözden vazgeçti.
2017 senesi noyabrniñ 23-nde Aqmescitte Rusiye telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar.
Olarnı Türkiye vatandaşından aqsız yerde para talap etkenlerinden şübheli sayılalar. Yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadın vefat etti.
Daa evel, bu işniñ figurantlarında sağlıq ile ciddiy problemalarnıñ olğanı bildirilgen edi. Bekir Degermencide sürekli astma bar. Çapuh tahqiqat izolâtorında mikroinsult keçirdi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
