Rusiye prezidenti Vladimir Putin Ukrainanı «ğayrıdan elge keçirmek» niyetinde. Bunı Ukraina prezidenti Petro Poroşenko Amerikanıñ CBS News telekanalına bergen intrvyüde bildirdi. Ukraina devletiniñ başlığı böyle etip, Putin Ukrainada nege irişmek istey ve o, Rusiyeniñ sıñırı yanında zayıf devletniñ olmasını isteymi, degen sualge cevap berdi.
Mayıs 8-de Ukraina prezidentiniñ matbuat hizmeti: «Ebet, ğayrıdan elge keçirmek. Ve SSCB ya da Rusiye imperiyasını qaytarmaq», – dep, Poroşenkonıñ sözlerini naqil ete.
Poroşenko: «O, (Putin – QA) Sovet Birligini qaytaracaq ola. O, intervyüde, 20-nci asırnıñ eñ büyük felâketi nedir, degen sualge – Ekinci cian cenki degil, Hirosima degil, Çernobıl degil de, SSCBniñ dağılması, dedi», – dep qayd etti.
Donbassta şimdi ne qadar Rusiye askeri bar, degen sualge prezident: «Bizde, türlü devirlerde işğal etilgen territoriyalarda olarnıñ sayısı 10-dan 2,5 biñge qadar muntazam Rusiye askeri olğanına dair tasdiqlanğan malümat bar. Buña ilâve olaraq olarda «rus volontörları» denilgen ve Rusiye mobilizatsiya sisteması vastasınen toplanıp anda yollanğan 50 biñ kişilik ordu bar», – dep cevap berdi.
Ondan ğayrı, Ukraina devletiniñ başlığı, Ukraina tarafınıñ malümatına köre, şimdi Donbassta cenkleşkenlerniñ 50%-i Rusiye vatandaşı ola, dedi.
Donbasstaki silâlı çatışma, 2014 senesinde Qırım Rusiye tarafından ilhaq etilgen soñ başlap, ale daa devam ete. Ukraina ve Ğarp Rusiyeni separatistlerge silâlı şekilde qol tutqanında qabaatlaylar. Kreml bu qabaatlavlarnı inkâr ete, ve Donbassta yalıñız Rusiyeden kelgen «göñülliler» bulunmaq mümkünler, dey. BMTniñ malümatına köre, çatışma esnasında 10 biñden ziyade kişi elâk oldı.
