Rusiye telükesizlik hadimleri Qırımda 2018 senesiniñ ilk üç ayı içinde 39 kişini tevqif etti ve 170 kere adaletli muhakeme aqqını bozdılar. Bunı mayıs 8-de Kyivdeki matbuat konferentsiyasında Qırımtatar Milliy Meclisiniñ azası, Qırımtatar resurs merkezi idaresiniñ başlığı Eskender Bariyev bildirdi.
Bunıñnen birlikte o, 39 tevqif etilgeninden 28-i qırımtatar edi, dep añlattı.
Bariyev: «Barışıqlı toplaşuv aqqınıñ eki bozuluvı. İlhaq etilgen Qırımnı qanunsız ziyaret etüvniñ 26 ve Qırımdan qanunsız olaraq zornen çıqarıluvnıñ 24 adisesi. Ve işğal etilgen territoriyada qanunsız arbiy talimler ötkerilüvniñ 9 adisesi», – dedi.
Ondan ğayrı o, Rusiye telükesizlik hadimleri yalıñız üç ay içinde 28 kişini yaqaladılar, dep qayd etti.
«Birinci kvartaldaki yaqalanuvlarnıñ umumiy sayısı – 28. Olardan 14-ü – yaqalanğan tamır halqınıñ vekilleri. 40 qanunsız sorğulama adisesi qayd etildi, olarnıñ 22-isi – qırımtatar halqınıñ vekillerine qarşı yapıldı», – dedi Bariyev.
Qırım Rusiye tarafından ilhaq etilgen soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq olaraq kütleviy surette tintilmekteler.
