Link açıqlığı

Saatnıñ esas haberi

Qırımtatarlar içün muhtariyet meselesi sürgün etilüv içün tazminattan daa muimdir – Meclis azası


Gayana Yüksel
Gayana Yüksel

Qırımnıñ ilhaqından soñ dört yıl keçkende qırımtatarlar içün Ukraina sıñırları içünde milliy-territorial muhtariyet meselesi, sovet sürgünligi içün tazminat problemasından daa muim yerni tutmağa devam ete. Bunı Qırım.Aqiqat Radiosı efirinde bergen intervyüde Qırımtatar Milliy Meclisiniñ azası Gayana Yüksel söyledi.

Meclis azası: «Kerçekten, yarımadada aqlav aqqında Rusiye qanunı qabul etildi, insanlar sürgün etilüv aqqında malümatnameler ve pensiyalar ile ödemelerge qoşumça para alalar. Lâkin de facto ve de jure Qırımğa, elbette, Ukraina akimiyetini beklemek kerek olacaq. Faqat, qıtada olıp keçkenlerni közeterkken, şimdi kün tertibinde daa global meseleler turğanını ayta bilem. Çünki, ne olsa da, tazminatlar uzun muddet içinde olmadı ve daa biraz vaqıt olmasalar bir şey printsipial surette deñişmez. Artıq eki yıldan berli devam etken Anayasağa (qırımtatar milliy-territorial muhtariyeti meselesine dair – QA) deñişmeler kirsetüv ceryanı boyunca muayen neticeler ile çıqmaq, tamır halqınıñ statusı aqqında qanunlarnı qabul etmek kerek ve ilahre», – dep qayd etti.

«Milliy alâmetke köre sürgün etilgenlerge aqlarınıñ qaytarıp berilmesi aqqında» Ukraina qanunını Yuqarı Rada daa 2014 senesiniñ aprelinde qabul etti. Onda sürgün etilgenlerniñ statusı tayin etilip, olar ve mirasçıları içün devlet garantiyaları ve tazminatlar tayin etile. Ayrıca bu, sovet ukümetiniñ qararı ile mahsus yerleştirüv yerlerine zornen köçürilgen qırımtatarlarğa ve diger milletlerniñ vekillerine ve em de bu kişilerniñ aqrabalarına ait.

2017 senesinde Anayasa komissiyasınıñ iş gruppası, Ukraina Anayasası içün deokkupatsiyadan soñ Qırımnıñ statusına dair tüzetmeler işlep çıqmağa başladı. Deñişmeler, yarımadanıñ tamır halqı olğan qırımtatarlarnıñ öz Vatanında Ukraina devletiniñ sıñırları içinde öz taqdirini tayin etme aqqını nazar-itibarğa alıp, azırlandılar.

Anayasa komissiyasınıñ iş gruppası Ukraina Anayasasınıñ Qırım Muhtar Cumhuriyeti aqqında onuncı bölügi içün deñişmelerniñ azırlanmasını artıq 2017 senesiniñ noyabrinde bitirgen edi.

XS
SM
MD
LG