Ukraina Nazirler kabineti mayıs 10-da keçken oturışuvında Qırımtatarlarğa qarşı genotsid qurbanlarınıñ hatıra künündeki tedbirlerniñ planını tasdiqladı. Bunı muessiseniñ matbuat hizmeti bildire.
Bu yıl mayıs 18-de Kyivde Sofiya meydanında qırımtatar halqına qarşı genotsid qurbanlarınıñ hatırasına miting keçecek, ve ondan ğayrı Mustaqillik (Nezalejnosti) Meydanında, qırımtatar halqınıñ sürgün etilmesi ile alâqalı facialı vaqialarğa bağışlanğan fotosergi yapılacaq.
Aynı şu künü Qırımtatarlarğa qarşı genotsid qurbanlarınıñ hatıra kününe bağışlanğan «Rekviyem aqşamı» olacaq. Onda devletniñ vazifeli şahısları, cemiyet liderleri, siyasiy liderler, çetel devletleriniñ Ukrainadaki diplomatik missiyalarınıñ rehberleri, halqara teşkilâtlarnıñ temsilcileri, medeniyet ve ilim erbapları ve diniy teşkilâtlarnıñ rehberleri iştirak etecekler.
Mayıs-iyün aylarında, NKVD tarafından 1944 senesi mayıs 18-de başlanğan qırımtatar halqınıñ Qırımdan sürgün etilmesi mevzusında tele ve radio yayınlarınıñ ve vesiqalı filmlerniñ kösterilmesi ve şu cümleden «Haytarma» ve «Yabancı dua» («Çujaya molitva») filmleriniñ kosterilmesi planlaştırıldı.
Ondan ğayrı sıñırlar tışındaki Ukrainanıñ diplomatik temsilcilikleri qırımtatar halqına ve diger halqlarnıñ vekillerine qarşı genotsid ile alâqalı facialı vaqialarğa bağışlanğan bir sıra informatsion-añlatıcı tedbirler keçirecekler.
Daa evel Qırımtatar Milliy Meclisiniñ reisi, Ukraina halq deputatı Refat Çubarov, mayıs 18-de Kyivde Mihaylovskaya meydanında qırımtatar halqınıñ sürgün etilmesi qurbanlarınıñ hatırasına tedbirler ötkerilecek, dep bildirdi.
Çubarov, ilhaq etilgen Qırımdaki qırımtatarlarnı mayıs 18-de, Qırımtatar halqınıñ Qırımdan sürgün etilmesi qurbanlarını hatırlama kününde umum Ukraina sükünet daqqasına qoşulmağa davet etti.
O, Ukrainanıñ qıtadaki qısmında, qırımtatar halqını sürgün etüv qurbanlarınıñ hatırasına matem tedbirleri Herson vilâyeti, Geniçesk rayonı, Novoalekseyevka, Odesa, Lviv ve tedbirler ukrain ve yeudi cemaatlarınıñ iştiraki ile Holokost muzeyinde yapılacaq Dneprde keçecekler, dep qayd etti.
Onıñ bildirgenine köre, Türkiyedeki Ankara ve İstanbulda da, munasip şekilde mayısnıñ 13 ve 20 künlerinde qırımtatar halqına qarşı yapılğan genotsid neticesinde qurban ketkenlerniñ hatırasına mitingler keçecek.
Qırımdan qırımtatar halqınıñ sürgün etilmesi neticesinde qurban ketkenlerni hatırlama künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
