Aqmescit tahqiqat izolâtorınıñ (SİZO) rehberi ilhaq etigen Qırımda mahküm etilgen ve narazılıq köstererek 50 künden ziyade açlıq tutqan ukrain faaliyetçisi Baluhta şahsen tintüv keçirdi. Bunı Qırım.Aqiqatqa Qırımtatar Milliy Meclisi reisiniñ muavini Ahtem Çiygoz bildirdi.
Çiygoz: «Baluh açlıq tutmağa devam ete. Keçenlerde gece saat 11-den soñ onda ciddiy bir tintüv yapıldı. Onda SİZO rehberi şahsen iştirak etti. Bilgenim qadar, oña ekimlerni öyle de yibermediler», – dedi.
Tahqiqat izolâtorınıñ rehberi tarafından bu hususta izaat berilmedi.
Bunıñ arfesinde Qırım insan aqlarını qorçalav gruppasınıñ eksperti Vladimir Çekrıgin, ilhaq etilgen Qırımda mahküm etilgen ukrain faaliyetçisi Volodımır Baluhnıñ Aqmescit tahqiqat izolâtorınıñ hadimleri tarafından «azatlıq severligi» içün cezalanacağı ile qorqutılğanını bildirdi.
Baluh, mart 19-da ilân etken muddetsiz açlıqnı tutmağa devam ete.
İlhaq etilgen Qırımda mahkeme Baluhnı, arbiy yedekler saqlağanında qabaatlı tanıp, 3 yıl ve 5 ayğa koloniya-qasabada azatlıqtan marum etilmesi ve ondan ğayrı 10 000 ruble (qararnen 4600 hrivna) miqdarında cöreme tölemesine dair uküm çıqardı.
Faaliyetçige qarşı ekinci cinaiy iş Aqşeyh (Razdolnoye) qasabasındaki muvaqqat tutuluv izolâtorınıñ rehberi Valeriy Tkaçenkonıñ arizası esasında açıldı. O, Baluh onı kötekledi, dep iddia ete. Aynı zamanda faaliyetçi ve onıñ imayesi, Tkaçenko özü oña ucüm etkenini bildireler.
Mart 19-da Kremlniñ kontroli altında olğan Aqşeyh rayon mahkemesi Volodımır Baluhqa 2018 senesi iyün 19-ğa qadar tevqif etilüv şeklinde sıñırlav tedbirini sayladı.
Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar, dep iddia ete ediler.
Baluhnıñ imayesi ve aq-uquq qorçalayıcıları, onıñ Ukraina vatanperveri olğanı sebebinden – eviniñ azbarında Ukraina bayrağı olğanı içün repressiyalar qurbanı olğanını iddia eteler.
