Link açıqlığı

Saatnıñ esas haberi

Aqmescitteki mektep talebeleri ve studentlerni arbiy paradğa kelmege mecbur ettiler


Aqmescitte «ölümsiz polk» tedbiri, 2018 senesi mayıs 9 künü
Aqmescitte «ölümsiz polk» tedbiri, 2018 senesi mayıs 9 künü

Aqmescitteki mektep talebeleri ve studentlerni Rusiyedeki Ğalebe kününde yapılğan arbiy paradğa kelmege mecbur ettiler. Bunı Qırımtatar Milliy Meclisiniñ azası, Qırımtatar resurs merkezi idaresiniñ başlığı Eskender Bariyev özüniñ Facebooktaki saifesinde bildirdi.

Bariyev: «Evelden bildirgenim kibi, bazarertesi künü Aqmescit mektepleriniñ balalarına Georgiy şeritlerini ketirmege vazife berdiler. İşançlı menbadan alğan malümatıma köre, esas olaraq qırımtatar qorantalarından olğan balalar bu şeritlerni ketirmedi. Bunıñ cezası olaraq (qırımtatarlar toplu yaşağan yerlerde bulunğan) 42 ve 44-sanlı mekteplerniñ 4-nci – 10-ncı sınıf balalarını ve bunıñ kibi de (Ukrainanıñ bücetinden paralar ayırılıp meydanğa ketirilgen aliy oquv yurtu olğan) QMPU studentlerini mayıs 9 paradına kelmege mecbur ettiler», – dep yazdı.

Qırımnıñ Rusiyege tabi ukümeti tarafından bu hususta açıq menbalarda berilgen izaatlar yoq.

Ukraina aq-uquq qorçalayıcıları ilhaq etilgen Qırımda balalarnıñ askeriyleştirilgen şekilde terbiye etilgenine defalarca diqqat çekti. Psihologlar Rusiyeniñ zemaneviy tasilinde balalarnıñ şuurına tazyiq etilgenini qayd eteler.

Mayıs 9-da Aqmescitte, Aqyarda ve Keriçte arbiy paradlar ve «ölümsiz polk» tedbirleri keçti. Olarda cümleden mektep talabeleri ve studentler iştirak etti.

Rusiye tarafından ilhaq etilgen Qırımda mayıs 9-da sovet bayramı olğan Ğalebe künü qayd etile. Bu kün Qızıl ordu ve sovet halqınıñ natsist Almaniyası üzerinde ğalebe bayramı sayıla.

XS
SM
MD
LG