Ukraina Tış işleri nazirligi Rusiyeden Aqyardaki «Hizb ut-Tahrir işi» boyunca tevqif etilgen Ferat Sayfullayevniñ azat etmesini talap ete. Bunı mayıs 9-da Twitterde muessiseniñ spikeri Maryana Betsa bildirdi.
Bidirüvde: «Rusiyede qanuniysizlikniñ sıñırı yoq. Siyasiy mabüsler – Rusiye cenkiniñ aletleridir. Sayfullayevniñ azat etilmesini talap etemiz», – denile.
Bunıñ arfesinde Rusiye Adliye nazirliginiñ Sayfullayevni Ukrainanıñ qıtadaki qısmına alıp berilmesini red etkeni belli oldı.
2017 senesiniñ sentâbrinde Rostov-na-Donu şeerindeki Şimaliy Kavkaz okrugınıñ arbiy mahkemesi uküm çıqardı. Oña binaen «Hizb ut-Tahrir işi» boyunca qabaatlanğan Aqyar sakinleri Ferat Sayfullayev, Rustem Vaitov ve Nuri Primovğa umumiy rejimli tertipke qoyucı koloniyada beşer yıl berildi.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ diniy alâmetke köre taqip etilgenlerini tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca taqip etilgenlerniñ esasen qırımtatarlar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
