Kremlniñ kontroli altında olğan Bağçasaray rayon mahkemesi, «Salaçıq» qırımtatar qavehanesiniñ vaqtınca qapalması aqqında qarar baqılacaq oturışuvını başqa künge avuştırdı.
Bunı mayıs 7-de «Salaçıq» qavehanesiniñ memuriyeti özüniñ Facebooktaki saifesinde bldirdi.
Bidlirüvde: «Bugün, mayıs 7-ge planlaştırılğan «Salaçıq» kervan-sarayınıñ vaqtınca qapalması boyunca mahkeme oturışuvı başqa künge avuştırıldı. Bu, qavehane memuriyetiniñ bu iş boyunca bütün vesiqalar paketini yalıñız bugün alğanı sebebinden oldı. Oturışuv künü belli olğan soñ biz sizge onı bildirirmiz», – denile.
Aprel 27-de qavehaneniñ memuriyeti, «Rusiye mahkemesiniñ qararınen» «Salaçıq» öz işini vaqtınca toqtata, dep bildirdi. 2017 senesiniñ oktâbrinde Bağçasaraydaki «Hizb ut-Tahrir işi» boyunca tevqif etilgen Marlen Asanov muessiseniñ mudiri ola.
2017 senesiniñ oktâbrinde Rusiye telükesizlik hadimleri Bağçasaraynıñ altı sakinini yaqaladı. Bular – Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametov. FSB olarnı Rusiye ve onıñ tarafından ilhaq etilgen Qırımda yasaq etilgen «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
