Moskvada «O, bizim içün çar degil» narazılıq tedbiriniñ iştirakçileri ile aynı vaqıtta şeerniñ soqaqlarına qazaq uniformasını kiygen ve özüni general Baklanov adına Qırım qazaq polkunıñ uruşmacıları olaraq tanıtqan kişiler çıqtı.
Bunı Rusiyeniñ «RBK» neşiri bildire.
Jurnalistlerniñ malümatına köre, olar, ukümet tarafını tutqan milliy azatlıq areketiniñ tarafdarları ile beraber narazılıq köstergenlerge ucüm ete edi. Ondan soñ polis hadimleri olarnıñ raqiplerini sert bir şekilde yaqalay edi.
Neşirniñ bildirüvinde: «Türlü qazaq teşkilâtları muntazam surette narazılıq tedbirlerine qatılıp, ğayrı-şekliy göñülli polis yardımcıları rolüni eda eteler. Olar sıq-sıq muhalefet vekillerine ucüm ete», – denile.
Rusiye telükesizlik saytlarında Qırımdan kelgen qazaqlarnıñ yaqalanuvı aqqında malümat yoq.
General Baklanov adına Qırım qazaq polku 2014 senesi mart 1-de, dünya tarafından tanılmağan ve neticesinde Rusiye Qırımnı özüne qoşqan «referendum»da munasip hizmetler köstermek içün meydanğa ketirildi.
Qomşu Rusiyeden kelgen qazaqlar, «halq ordusı»nıñ uruşmacıları, Qara deñiz flotunıñ arbiy hadimleri ve Rusiye mahsus hizmetleriniñ hadimleri ile birlikte blok-postlarda nevbet tuta, soqaqlarda devriye keze ediler.
Ondan ğayrı qazaqlar memuriy binalarnıñ zapt etilmesi ve 2014 senesi fevral 26-da keçken miting esnasında qırımtatarlar ve ukrain faaliyetçilerine qarşılıq kösterilmesinde iştirak ettiler.
