Ukraina pensiya fondu, Qırım sakinleriniñ pensiyaları aqqında malümatnı sorap Rusiyege muracaat etkende Ukrainanıñ şahsiy bilgilerni qorçalav ve insannıñ şahsiy ayatqa aqqı boyunca qanunını boza.
Böyle beyanatnı İnsan aqları boyunca Helsinki birleşmesiniñ adliyecisi Maksim Timoçko, Qırım.Aqiqat Radiosı efirinde yaptı.
Onıñ aytqanına köre, Qırımdan mecburen köçkenler Ukraina Pensiya fonduna pensiyanı almaq içün muracaat etkende böyle adiseler ile qarşılaşa.
Timoçko: «Qırımdan kelgen insan, evini işğal etken devletke onıñ şahsiy bilgilerini kenişletken devletten ne içün zarar körmek kerek? Pensiya fondu, Rusiyenen degil de, Qırımnen yazışqanını beyan ete. Lâkin mektüpler kene de işğalci ukümetke barıp tüşse, bu neni deñiştire? Bu, bütünley qanunsızdır, bunı endi çoqtan berli toqtatmaq kerek edi. Mence, uquqqoruyıcı organlar buña erte-keç kerekli qıymet kesecekler», – dedi.
İnsan aqları boyunca Helsinki birleşmesiniñ adliyecisi Maksim Timoçko ile tolu intervyüni Qırım.Aqiqat saytında eñ yaqın künlerde oquñız.
Ukraina aq-uquq qorçalayıcıları, Qırımnıñ Rusiye tarafından ilhaqından soñ Ukrainanıñ qıtadaki qısmına mecburen köçken Qırım sakinlerine içtimaiy yardımnıñ tölenmemesi meselesi ortağa çıqtı, dep qayd eteler. Olarnıñ malümatına köre, Ukraina memurları, Qırımda «kim» ve «ne» alğanını bilmek içün Rusiye tarafına muracaat ete. Böyle tölemeler yapılğan olsa, Qırım sakinine maddiy yardım berilmesi red etile. Ukraina muessiseleri Rusiyeden Qırım territoriyasında yapılğan tölemeler aqqında malümat sorağanlarını inkâr etmeyler, lâkin bunı «qanunlarğa uyğun şekilde» yapqanlarını iddia eteler.
