Mayıs 5-te Arabat belinde qırımtatarlarnıñ Hıdırlez bayramı yapılacaq. Bunı Qırım.Aqiqatqa bayram tedbirleriniñ teşkil eticisi olğan Herson vilâyetindeki Sçastlivtsevo köy şurasınıñ reisi Viktor Plohuşko bildirdi.
Bayramnı Sçastlivtsevo köyüniñ park zonasında saat 16:00-da başlamağa planlaştıralar. Planlaştırılğan merasimler arasında bayram kontserti, yarışlar ve ayrıca qırımtatar milliy küreşi boyunca yarış yer almaqta. Bayramğa kelgen musafirlerge pilâv ikram etilecek.
Plohuşko, Sçastlivtsevoda Hıdırlez şeñlikleri endi ardı-sıra ekinci yıl yapılğanını ve köy şurası territoriyasında ealiniñ 20%-ini qırımtatarlar teşkil etkenini bildirdi.
Yerli meclislerniñ malümatına köre, Herson vilâyetinde 10 biñden ziyade qırımtatar yaşay. Olarnıñ eñ büyük kompakt mesken yerleri Geniçesk rayonında buluna.
Hıdırlez – türkiy halqlarınıñ eñ büyük bayramlarından biri. XIX asırda onıñ şeñlikleri üç kün devam ete ediler.
Qırımnıñ ilhaqından soñ Qırımtatar Milliy Meclisiniñ vekilleri yarımadanıñ territoriyasında yapılğan Hıdırlez şeñliklerinde iştirak etmekten vazgeçtiler. Ondan ğayrı olar, Rusiye tarafından ilhaq etilgen Qırımda bulunğan yurtdaşlarını da böyle şeñliklerde iştirak etmekten vazgeçmege davet ettiler.
