«Hizb ut-Tahrir işi» boyunca tevqif etilgen ağa-qardaş Uzeir ve Timur Abdullayevlerniñ anası Dilâra aprel 30-da Aqmescitte «Qırım birdemligi» birleşmesiniñ ayda bir kere yapılğan körüşüvinde oğullarınıñ Aqmescit tahqiqat izolâtırında tutuluv şaraitleri aqqında ikâye etti.
Bunı Qırım.Aqiqat muhbiri bildire.
«Aqmescit tahqiqat izolâtorında tutuluv şaraitleri deşetli. Rehberler, oğullarımda sağlıq vaziyetiniñ fenalaşqanına dair bergen şikâyetlerime cevaben, bu normaldir, dediler. Yani olar (tevqif etilgenler – QA) adaptatsiya muddetini keçe, ondan soñ ise er şey öz yerine kelecek. Amma anda elementar şaraitler kütülmese, nasıl olıp da, er şey yerine kelsin. Misal içün, Uzeir oturğan kamerada 28 kişi otura, aynı zamanda anda yalıñız 18 yataq bar», – dep bildirdi o.
Dilâra Abdullayevanıñ malümatına köre, kence oğlu Timurda sürekli gepatit C hastalığı bar. O, tahqiqat izolâtorında onda gepatitni tayin etmek içün talil yapıldı, dep ilâve etti.
Abdullayeva: «Ekimler hastalıqnıñ olğanını tasdiqladı, lâkin, hastalıqnıñ şekli qanaatlendirici olğanını bildirip, vaziyetiniñ eyilişmesi içün bir şey yapmadılar», – dep yekün çekti.
Qırımtatar Milliy Meclisiniñ reisi, Ukraina halq deputatı Refat Çubarov, Aqmescitteki «Hizb ut-Tahriri işi» figurantı Uzeir Abdullayev «ölüm telükesi altında» edi, dep bildirgen edi.
Uzeir Abdullayevniñ apayı Fera Abdullayeva, onıñ aprel 30-da Aqmescitteki tahqiqat izolâtorınıñ tibbiy bölügine keçirilgenini bildirdi .
Ağa-qardaş Uzeir ve Timur Abdullayevler 2016 senesiniñ oktâbrinde Qırımnıñ Aqmescit rayonında Rusiyede yasaq etilgen Hizb ut-Tahrir teşkilâtında iştirak etkenlerinde qabaatlanıp, yaqalanğan ediler.
Kermlniñ kontroli altında olğan Qırım Yuqarı Mahkemesi oktâbr 25-te «Hizb ut-Tahrir işi» figurantı Timur Abdullayevniñ tevqifini dekabr 11-ge qadar uzattı.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokat Emil Kurbedinov, bu iş boyunca Rusiye uquqqoruyıcı organları tarafından esas olaraq qırımtatarlar ve olardan ğayrı İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenlerini qayd ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
