Aqyarda ekinci «Qırım feneri» festivaliniñ açılışında ilhaq etilgen Qırımdan Rusiye deputatı Olga Kovitidi, Yunanistannıñ sanktsiyalar sebebinden Qırım saknlerine vizalar açmağanına şikâyet etti.
Bunı Qırım.Aqiqat muhbiri bildire.
«Eminim ki, Yunanistan ukümeti, Yunanistan parlamenti Yunanistan severleri, ellinofillerni eşitmek ve Qırım sakinlerine vizalar bermek içün özünde küç tapar. Keçken yılı Yunanistanğa pek çoq bala barmaq kerek edi. Qırım sakinlerine vizalar açılmağanı sebebinden balalarnıñ iç birisi barmadı», – dedi o.
Ondan ğayrı Kovitidi öz çıqışında Aqyarnıñ Rusiyege tabi ukümetinden yunan cemiyeti içün yañı binanıñ ayırılmasını rica etti.
Festivalni Qırımdaki yunanlarnıñ milliy-medeniy muhtariyeti ve, ondan ğayrı, Kremlniñ kontroli altında olğan Qırım ve Aqyar ukümetleriniñ vekilleri teşkil ettiler.
Panorama ögündek Tarihiy bulvarnıñ meydanında qomşu Rusiye bayrağı renklerindeki qumaş açıldı.
Festivalniñ açılış merasiminden soñ iştirakçiler Yunan batalyonı uruşmacılarınıñ eykeline çiçekler qoydı.
