Rusiye botları, leyboristler lideri Ceremi Korbinge qol tutıp, Twitter vastasınen Büyük Britaniyada keçken senedeki saylavnıñ neticelerine tesir etmek istediler. Bunı The Times, bir universitet ile birlikte keçirgen öz tetqiqatnıñ neticesine atıfta bulunıp, bildire.
Neşirniñ malümatına köre, Korbin içün teşviq etken ve konservatorlarnıñ lideri Tereza Meyni tenqit etken 6,5 biñ şübheli esap tayin etildi.
Leyborist firqası içtimaiy ağlardaki propagandağa alâqası olmağanını bildirdi.
Cemaatlar Palatasına (parlamentniñ aşağı palatasına) 2017 senesiniñ muddetten evelki saylavında Ceremi Korbinniñ başlığındaki Leyborist fırqası, bundan evelki 2015 senesi saylavına köre, 32 mandat ziyade alıp ve neticede Cemaatlar Palatasındaki 650 yerden 262 yerni qazanıp, daa yahşı netice kösterdi.
Bu aftada AQŞta Amerika prezidentiniñ saylavına Rusiyeniñ ihtimallı qarışuvı aqqında maruzanı halqqa tanıttılar. Vesiqada, Rusiyeniñ, mahsus hizmetlerniñ agentleri ve içtimaiy ağlar ile matbuattaki propaganda vastasınen rey berüvge tesir etmek istegeni bildirile. Rusiye özüniñ diger devletlerdeki saylavlarğa alâqasını qatiyen red ete.
