Bunıñ arfesinde «Çaplinka» kiriş-çıqış kontrol noqtasında Ukraina sıñırcıları hizmet köpeginiñ yardımınen Mersedes aydayıcısında yasaq etilgen patronlar taptılar. Bunı Ukraina Devlet sıñır hizmetiniñ matbuat hizmeti bildire.
Sıñırcılarnıñ malümatına köre, Ukraina vatandaşı olğan Herson vilâyetiniñ sakini Aqmescitke yol tuta edi.
Bildirüvde: «Naqliyat vastası hizmet köpegi yardımınen teşkerilgende sıñırcılar, Devlet maliye hizmetiniñ hadimleri ile birlikte qoltuqta memuriy sıñırdan keçirilmesi yasaq etilgen 9 dane 9 kalibrli ve 1 dane 12 kalibrli patronlar taptılar», – denile.
Muessisede, sıñırcılar tapqanlarını Milliy polisniñ Kalançak bölügine alıp berdi, dep qayd ettiler.
Daa evel Ukraina sıñırcıları, Ukraina uquqqoruyıcıları tarafından hırsızlıqtan dolayı şübheli tanılğan Ukrana vatandaşı hanımnı yaqaladılar.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».
