Türkiye, AQŞnıñ Rusiyeden S-400 avadan mudafaa sistemalarınıñ satın alınmasından saqındırmalarını red etti. Türkiye tış işleri naziri Mevlüt Çavuşoğlunıñ bildirgenine köre, Rusiyeden S-400-lerini satın aluv aqqında 2,5 milliard dollarlıq añlaşma dekabr ayında imzalandı ve onıñ ğayrıdan baqılması imkânsızdır.
Onıñ aytqanına köre, Ankaranıñ ricası ile Rusiye, raketa sistemalarınıñ ketirip teslim etilmesi «ceryanını tezleştire».
«Biz S-400-lerni satın aluv ceryanını bitirdik. Bu, tamamlanğan alım-satım añlaşmasıdır… «Alsañız, sanktsiyalar tatbiq etecekmiz» yanaşuvı ise Türkiyege tesir etemez. Türkiye bunı qabul etmey», – dedi o.
Bunıñ arfesinde AQŞ devlet sekretari Mayk Pompeo, Ankaranıñ niyetleri sebebi ile ciddiy endişeni ifade etip ve Türkiyege qarşı sanktsiyalarnıñ tatbiq etile bilecegini bildirip, türkiyeli zenaatdaşını Rusiye raketa sistemalarınıñ satın alınmasından saqındırdı.
Türkiye, Rusiye ile S-400 avadan mudafaa sistemalarınıñ satın alınması aqqında añlaşmanı 2017 senesiniñ sentâbrinde imzaladı. Bu añlaşma Ğarpta endişe doğurdı, çünki Türkiye NATOnıñ azası ola, avadan mudafaa silâsınıñ sistemalarını ise Alyansnıñ mudafaa sisteması ile birleştirmege çaresi yoq.
Ondan ğayrı, bazı ğarp devletleri, Ukrainanıñ şarqı ve Suriyedeki cenklerde oynağan rolü sebebinden Rusiye ile munasebetleriniñ keskinleşmesi şaraitinde Türkiyeniñ Rusiyeden S-400-lerini almaq niyetini, NATOğa yapılğan aqaret olaraq qıymet keseler.
