Kremlniñ kontroli altında olğan Qırım Suv iqtisadı boyunca komitetiniñ (Goskomvodhoz) başlığı İgor Vayl, Qırımnıñ şimalinde yerastı suvlarında tuz seviyesiniñ (mineralizatsiyanıñ) artqanı aqqında bildirdi. Bunı memur Aqmescitteki matbuat konferentsiyasında söyledi, dep bildire «Krıminform».
Vayl: «Şimaliy Qırımda suv alımınıñ artması boyunca vaziyet bundan evel olğanı kibi muşkül. Yerastı suvlarında, vaqıt içinde sabit olğan minerasizatsiyanıñ artuvı közetile. 2017 senesinde ötkerilgen yerastı suvlarnıñ monitoringi neticesinde, gidrohimiyeviy vaziyette eyileşme olmadı, dep qayd etildi. Qırımdaki suv alımı tesisleriniñ büyük qısmı muşkül bir işletüv vaziyetinde buluna. Yedekleri tasdiqlanğan 100-den ziyade suv alımı tesislerinde aşırı mineralizatsiya közetile», – dedi.
Onıñ aytqanına köre, bu vaziyetten çıqmaq içün bir yol – suv tatlılaştırma sistemalarınıñ qoyulmasıdır. Keçken yıldan başlap, Curçı (Pervomayskoye) rayonında test rejiminde fiyatı 1,2 mlin ruble olğan Rusiyede işlep çıqılğan suv tatlılaştırma sisteması çalışa. «Bu pilot leyhası cumhuriyet başlığınıñ buyruğı boyunca azırlanğan edi. Test muddeti keçken soñ, programmanı işlep çıqmaq içün buyruq berilse – bizde açıq-aydın añlayış ile talil ve insanlar qullanğan suvlar devlet standartlarına uymağan mesken noqtalardaki sakinlerniñ sayısı ile tüzgün bir cedvel bar. Programmanıñ işlep çıqılmasına buyruq berilse, kerek olacaq paralarnıñ miqdarı sayılır», – dep ilâve etti Vayl.
Goskomvodhoznıñ reisi, yerastı suvlarnıñ seviyesi çoq yıllıq közetilmelerniñ orta qararlarında buluna ve büyük bir deñişmeleri olmadı, dep ilâve etti.
Qırım Rusiye tarafından ilhaq etilgen soñ Ukraina, Dneprniñ baş yatağını yarımadanen bağlağan Şimaliy Qırım kanalı boyunca yarımadağa suv bermekni toqtattı. Ukraina bu kanal vastasınen Qırımnıñ tatlı suvda ihtiyaclarınıñ 85%-ini temin ete edi.
