Rusiyeniñ kontroli altında olğan Kefe memuriyeti, qırımtatarlarnıñ sürgün etilmesi qurbanları hatırasına tedbirniñ uyğunlaştırılmasını red etti. Bunı Qırım.Aqiqat muhbirine tedbirniñ teşkil eticilerinden biri, Suleyman Kadırov bildirdi.
Onıñ aytqanına köre, o, aprel 26-da sürgünlik qurbanlarınıñ eykeli yanındaki territoriyanı temizlemek maqsadı ile yurtdaşlarınen beraber Qaradağ qoruğına köterilmekni planlaştıra edi. Onıñ aytqanına köre, iştirak etkenlerniñ sayısı 100 kişigece olacaq tedbirniñ keçirilmesine dair arizanı o, evelden bergen edi. Cemiyetçiniñ iddia etkenine köre, Kefe şeeriniñ milletlerara munasebetler bölüginde Qırım muftiyatından ruhset ve «Millet» telekanalınıñ matem tedbirinde mutlaqa bulunmasını talap ettiler. Teşkil eticileri içün bu şartlar uyğunsız olğanından dolayı olar dağğa köterilüvni lâğu etmege qarar berdiler.
Suleyman Kadırov: «Bunıñ kibi tedbirlerni 2014 senesinde yasaq etip başladılar. Muftiyat tarafından «resmen» ötkerilgen tedbirlerge ise bucetçiler ve mekteplilerni zornen ketire ediler. Biz sürgün etilgenlerniñ eykelleri yanında kelgende, bizni izinsiz yapılğan miting aqqında tebiley ediler. Bu şimdi de devam ete», – dedi.
Rusiyege tabi Kefe memuriyetiniñ vekilleri şimdilik vaziyetni izalamadılar.
Qırımtatar halqınıñ Qırımdan sürgün etilmesi qurbanlarını hatırlama künü er yıl mayıs 18-de ötkerile. 1944 senesi bu künde yarımadadan Orta Asiyağa qırımtatarlar ile birinci eşelon yollanılğan edi. Umumen 180 biñden ziyade qırımtatar sürgün etildi.
