AQŞ devlet kâtibi Mayk Pompeo, türkiyeli zenaatdaşını Rusiye «yer-ava» raketa sistemasınıñ alınmasından saqındırdı, dep bildire Azatlıq Radiosı.
Pompeo, Türkiye tış işleri naziri Mevlüt Çavuşoğluğa, Rusiyeniñ S-400 sisteması, radarları ve raketa batareyaları Ankaradaki NATO ittifaqdaşlarınıñ quvetleri ile birleştirilemeycekler, dep bildirdi.
Bildirilgenine köre, Pompeo türkiyeli zenaatdaşına, S-400lerni alması taqdirde Ankara sanktsiyalar ile qarşılaşa bilecek, dep hatırlattı.
Türkiye mudafaa hadimleriniñ aytqanına köre, Ankara ile Moskva, Rusiyeniñ Türkiyege eki S-400 sistemasını ketirip teslim etecegi aqqında muqaveleni imzaladı.
Dekabrde Türkiye Mudafaa naziriniñ muavini, raketa sistemasınıñ birinci teslimi 2020 senesiniñ birinci kvartalına planlaştırılğan, dep bildirdi.
Bildirilgenine köre, qararnen 2,5 milliard dollarlıq olğan bu alım-satım añlaşması Ğarpta telaş doğurdı, çünki Türkiye NATOnıñ azası ola, avadan mudafaa silâsınıñ sistemaları ise Alyansnıñ mudafaası ile birleştirilemeycekler.
