Link açıqlığı

Saatnıñ esas haberi

Kremlniñ kontroli altında olğan Qırım parlamentiniñ vitse-spikeri Remzi İlyasov istifa aqqında ariza yazdı. Bunı Facebooktaki saifesinde Qırımtatar Milliy Meclisiniñ reisi Refat Çubarov yazdı.

Çubarov: «Mıyıqlı istifa aqqında ariza yazdı, deyler. Bunı teşkerdik. Tasdiqlana – «Qırım Devlet şurası reisiniñ muavini» vazifesinden istifağa çıqa», – dep yazdı.

Refat Çubarovnıñ postu
Refat Çubarovnıñ postu

Rusiyege tabi Qırım parlamenti saytında şimdilik bu malümatnıñ tasdiqlanğanı yoq.

Qırım.Aqiqatnıñ, bu malümatnı ya tasdiqlamaq, ya da red etmek ricasına qarşı İlyasov: «Men çalışam. Er şey öz yolunda», dep, bundan soñki izaatlardan vazgeçti.

Qırım parlamentiniñ saytındaki malümatqa köre, Remzi İlyasov Qırımnıñ ilhaqından evel Qırım Muhtar Cumhuriyeti Yuqarı Radasınıñ Milletlerara munasebetler ve sürgün etilgen vatandaşlar boyunca daimiy komissiyanıñ reisi edi.

Qırımnıñ ilhaqından soñ 2014 senesi mayısında Rusiyege tabi Qırım parlamentiniñ vitse-spikeri oldı.

2016 senesiniñ dekabrinde QMC prokuraturası mahkemege Qırım Muhtar Cumhuriyeti Yuqarı Radasınıñ on bir sabıq deputatına qarşı qabaatlav aktları yolladı. Aktlarda olar, devletke qarşı hainlikte qabaatlana. Deputatlarnıñ cedvelinde İlyasov da qayd etilgen.

QMC prokuraturası tahqiqat esnasında «2014 senesiniñ martında Qırım Muhtar Cumhuriyeti Yuqarı Radasınıñ bu deputatlarınıñ Qırımnıñ işğaline yardım etkenine ve qol tutqanına» red etilmez delillerni elde etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG