Ukrainanıñ qıtadaki territoriyasında bulunğan Qırım musulmanlarınıñ diniy idaresi muftisi Ayder Rustemov, Qırımdaki Rusiye ukümetiniñ, yarımadada musulman aliy oquv yurtunı açmaq planları aqqında beyanatları, piar ve tarafdarlar qazanmaq teşebbüsi ola bile, dep saya. Bu fikirni o, Qırım.Aqiqat Radiosı efirinde paylaştı.
Mufti: «Bu piardır… Anda bulunğan Qırım ve Aqyar musulmanlarınıñ diniy idaresi, qırımtatar halqınıñ közünden bütünley çıqtı. Lâkin barıp da, piar olmasa, ve olar anda bir şeyler yapıp başlasalar, biz, acınıqlı bir tarafdarlar qazanmaq teşebbüsini körecekmz. Rusiye musulman cemiyetini içeriden bölmek içün iç bir vaqıt imkânlar ve usullardan vazgeçmey edi», – dep qayd etti.
Bundan evel Rusiye Devlet Dumasınıñ ilhaq etilgen Qırımdan deputatı Ruslan Balbek, kelecek yılı Bağçasarayda musulmanlar içün ayliy diniy muessiseniñ qurulması planlaştırlğanı aqqında bildirdi. Onıñ aytqanına köre, aliy oquv yurtunıñ qurulmasını Qırım ve Aqyar musulmanlarınıñ diniy idaresi teklif etken edi. Balbek, böyle oquv yurtu rusiyelilerni türlü ekstremistik ideologiyalardan qorçalaycaq, dep umüt etti.
Qırımdaki Rusiye ukümeti oquv yurtunı Zıncırlı Medrese – 1500 senesinde Qırım hanı Mengli Giraynıñ emiri ile qurulğan universitetniñ esasında tesis etmek istey.
2014 senesinde yarımada Rusiye tarafından ilhaq etilgen soñ Qırım musulmanlarınıñ diniy idaresi, areketlerini Meclisnen uyğunlaştırmaqtan vazgeçti ve Rusiyeniñ qanunları boyunca Qırım ve Aqyar musulmanlarınıñ diniy idaresi (QAMDİ) olaraq ğayrıdan resmiy qaydından keçti.
2016 senesiniñ noyabrinde Qırımdan köçken musulmanlarnıñ cemaatları qurultay toplap, onda Ukrainanıñ qıtadaki qısmında Qırım Muhtar Cumhuriyeti musulmanlarınıñ diniy idaresini meydanğa ketirmege qarar berdiler. Mufti vazifesine Ayder Rustemov saylandı.
2017 senesiniñ oktâbrinde Ukraina Medeniyet nazirliginiñ milletler ve dinler departamenti Rustemov başlığındaki Qırım Muhtar Cumhuriyeti musulmanlarınıñ diniy idaresini resmen qayd etti.
