Link açıqlığı

Saatnıñ esas haberi

Stoltenberg: Qırımnıñ qanunsız ilhaqı – Moskvanıñ havflı areketleriniñ neticesidir


Yens Stoltenberg
Yens Stoltenberg

NATO Baş kâtibi Yens Stoltenberg, Moskva soñki yıllar devamında «havflı areketler» yapa, olarnıñ arasına Qırımnıñ ilhaqı ve Donbasstaki vaziyetni stabilsiz alğa ketirüv kireler, dep bildirdi.

Bunı Stoltenberg, aprel 27-de Brüsselde keçecek NATO tış işleri nazirleriniñ muşaveresi arfesinde söyledi.

Stoltenberg: «Endi bir qaç yıl devamında Moskva havflı areketler yapa. Olarnıñ arasına Qırımnıñ qanunsız ilhaqı, Ukrainanıñ şarqını stabilsiz alğa ketirüv, demokratik ceryanlarğa qarışuv, kiberucümler ve dezinformatsiya kireler. Ondan ğayrı, Rusiye, defalarca himiyeviy silânı qullanğan Suriyeniñ canavar rejimine qol tuta. Ondan ğayrı, büyük ihtimal ile, Solsberideki siñir çarpıcı ucümniñ artında da Rusiye tura edi», – dedi.

Onıñ aytqanına köre, «NATO buña azimkârlıq ve birdemlik ile cevap berdi».

«Biz Suvuq cenkniñ bitkeninden soñ eñ büyük quvetleştirilmesini kerçekleştirdik, birleşmeniñ şarqiy qanatında bulunuv derecemizni arttırdıq, quvetlerimizniñ arbiy azırlığını yükselttik», – dep saya Stoltenberg.

O, «al-azırda ittifaqdaşlar mudafaa maqsatları içün daa çoq para yatıralar», dep ilâve etti.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG