Ukraina Nazirler kabineti «aliy oquv yurtu» ıstılasını «aliy tasil muessisesi» ıstılasına deñiştirdi. Bu, «Tasil aqqında» qanunğa uymaqtadır.
Ukraina Tasil ve ilim nazirliginiñ bildirgenine köre, aprel 25-te ukümet munasip qararnı tasdiqladı.
Tasil nazirliginde, ondan ğayrı medeniyet ve sanat erbapları içün dotsent ilmiy unvanını aluv ceryanı deñişti, dep ilâve eteler.
Ukraina tasil ve ilim naziriniñ muavini Yuriy Raşkeviç: «Qaideniñ bundan evelki variantında dotsent unvanı, cemiyet içinde tanılıp, bunıñ neticesinde «Ukraina halq artisti», «Ukraina halq ressamı», «Ukraina halq mimarı» ve «nam qazanğan sanat erbabı» fahriy unvanlarından birini qazanğan medeniyet ve sanat erbaplarına berile edi. Şimdi bu cedvel «Ukrainada nam qazanğan artist», «Ukrainada nam qazanğan ressam», «Ukrainada nam qazanğan mimar», «Ukrainada nam qazanğan medeniyet hadimi» ve «Ukrainada nam qazanğan halq icadı ustası» unvanları ile kenişletildi», – dep bildirdi.
Ukraina Yuqarı Radası tasil aqqında qanunnı 2017 senesiniñ sentâbrinde qabul etti. Qanundaki yañı ukümlerden biri, 12 yıllıq orta tasildir. Ondan ğayrı, vesiqa ocanıñ inkişafına ve onıñ ocalıq serbestligine yañı yanaşuvnı teklif ete. Şu cümleden, 5 yıl içinde seviyesini yükseltmek içün ayırılğan saatlarnıñ umumiy miqdarı eñ az 150 saat olacağını tayin ete.
