İlhaq etilgen Qırımda Rusiyeniñ ekstremizmge qarşı qanunlarınıñ qullanılması, repressiyalar ve musulmanlarğa terroristler degen Rusiye KHVleri tarafından yapılğan tecavuzkâr propaganda ile taqip etile. Bunı aprel 26-da informatsion siyaset naziriniñ birinci muavini Emine Ceppar beyan etti.
Ceppar: «Qırım qapalı bir informatsion zonağa çevirildi. Anda Rusiyeniñ propagandist resursları bizim sıqlıqlarımızda öz yayınlarını translâtsiya eteler. Olar daima, Ukrainanıñ ekstremistik devlet, qırımtatarlarnıñ terroristler, ukrainlerniñ de casus ve diversantlar olğanını tekrarlaylar. Ve bütün bular toqtamağan tintüvler ve yaqalanuvlar ile taqip etile. Olarnıñ esnasında, mecbur etilgen kibi tüşünmek istemegen insanlar repressiyalarğa oğraylar. Vatandaş jurnalistleriniñ, yani mustaqil informatsion saa temizlengen soñ Qırımda olıp keçkenlerni aydınlatqan şahıslarnıñ taqipleri devam ete», – dep bildirdi.
Qırımda Rusiyeniñ sadıq olmağan ealini taqip etmek içün ekstremizmge qarşı qanunlarınıñ qullanılması aqqında QırımSOS teşkilâtınıñ koordinatorı Tamila Taşeva ikâye etti. Aq-uquq qorçalayıcısı, Rusiye KHVleri Qırımda ekstremizm ve terrorizm merkeziniñ mevcüt olğanı aqqında mifni yaratıp, onı, Qırım territoriyasında pek çoq uquqqoruyıcı orğanlarnıñ hadimleri olğanına sebep olaraq köstereler, dep qayd etti.
Taşeva: «Rusiye KHVleri, diñleyicileri ve oquyıcılarınıñ közünde Qırım musulmanlarını marginallaştırmaq isteyler. Bu maqsatnen olarnı ekstremist ve terrorist olaraq köstereler. Aynı zamanda, bu işte pek küçlü bir etnik faktor bar, ve bu, pek havflıdır. Biz bütün halqara meydançıqlarda bu hususta aytamız», – dep qayd etti.
Aq-uquq qorçalayıcısı, Rusiye, sadıq olmağanlarını açıqtan bildirip, yaqalanmadan evel ülkeni terk ete bilgenlerni ekstremist ve terrorist deye Interpol tarafından qıdırılğanlarnıñ cedveline kirsete, dep, bunı Rusiyenıñ ekstremizmge qarşı qanunlarını başqa fikirde olğanlarnı taqip etmek içün qullanılğanına bir misal olaraq köstere.
Aprel 26 sabasında Qarasuvbazarda «Güzel» ticaret ağı ve «KrımOpt» şirketinniñ tükânlarında Rusiye telükesizlik hadimleri tarafından tintüvler yapılğanı belli oldı. Al-azırda Rusiye telükesizlik hadimleri ve Kremlniñ kontroli altında olğan Qırım ukümeti tarafından bu vaziyetke dair berilgen izaatlar yoq.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
