Aprel 26-da Kyivdeki Rusiye elçihanesiniñ yanında faaliyetçiler «FSBge telefon etiñiz» tedbirini keçire. Bunı Qırım.Aqiqat muhbiri bildire.
Tedbirni teşkil etken QırımSOS cemiyet teşebbüsiniñ sözlerine köre, bu, Qırımda ğayıp olğan insanlarnıñ qıdırılması ve tevqif etilgenlerniñ azat etilmesi maqsatlı Find and Free («Tap ve azat et») kampaniyasınıñ çerçivesinde er ay keçirilgen tedbirlerniñ endi 22-ncisidir.
Tedbirde aq-uquq qorçalayıcıları, yarımadanıñ ilhaqından soñ Qırımda Ukraina vatandaşlarnıñ zorbalıq neticesinde ğayıp olması ile alâqalı soñ malümatlar ile paylaşacaqlar, ve şu cümleden aprel 11-de Rusiye FSBsi hadimleri tarafından alıp qaçılğan ve qararnen eki afta devamında onıñ aqqında iç bir malümat olmağan ukrain Aleksandr Steşenkonıñ işi aqqında ikâye etecekler.
Aq-uquq qorçalayıcıları, Qırımnıñ Rusiye tarafından ilhaqından soñ yarımadada 46 kişi alıp qaçıldı, olardan 18-i ale daa tapılmadı, dep qayd eteler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
