Kremlniñ kontroli altında olğan Aqmescitniñ rayon mahkemesi advokat Emil Kurbedinov tarafından, tahqiqatnıñ Timur Şaymardanovnıñ ğayıp olmasına dair iş boyunca areketlerine qarşı berilgen şikâyetni red etti. Bunı Qırım.Aqiqat muhbiri bildire.
Kurbedinov: «Evelden tahmin etilgeni kibi, şikâyetim qanaatlendirilmedi. Redniñ sebebi añlatılmadı. Tahqiqat komiteti mahkemede, sanki menim adıma yollanılğan cevaplarnıñ kopiyalarını taqdim etti, lâkin olarnıñ kerçekten de yollanılğanına dair deliller yoq», – dedi.
Qorçalayıcınıñ añlatqanına köre, tahqiqatnıñ cevaplarında, oña işniñ materialları ile tanış olmaq içün izinniñ berilgeni qayd etile. O, bunı yaqın vaqıtta yapmaq istey.
Akem Olga Kuznetsova oturışuvnı qapalı rejimde, diñleyicilerni zalğa yibermeyip keçirdi. Kurbedinov 10 kün içinde mahkeme qararına qarşı şikâyet bermekni planlaştıra.
2014 senesi mayısnıñ soñunda Aqmescitte, yarımadanıñ arbiy istilâsına qarşı narazılıq tedbirleriniñ faal iştirakçileri Timur Şaymardanov ve Seyran Zinedinov habersiz ğayıp oldılar. Olarnıñ ğayıp oluv vaqiası boyunca em Qırımda, em de Ukrainanıñ qıtadaki qısmında cinaiy işler açıldı, lâkin şimdilik tahqiqat iç bir netice bermedi. Bu munasebet ile advokat Emil Kurbedinov, tahqiqatnıñ qaysı basamaqta olğanını tayin etmek içün işniñ materiallarını ögrenmege planlaştıra.
Qırımnıñ ilhaqından soñ yarımadada esasen qırımtatarlar arasında insanlarnıñ ğayıp oluvı vaqiaları daa sıq olıp başladı. Aynı zamanda Rusiyeniñ kontroli altında olğan Qırım Tahqiqat komitetinde, «yarımadada qırımtatarlarnıñ kütleviy surette ğayıp oluvı yoq», dep iddia eteler.
Qırım insan aqlarını qorçalav gruppası, alıp qaçuvlar Rusiye ukümeti, ya da olarnıñ kontroli altında olğan paramilitar gruppalar tarafından yapıldı, dep tahmin eteler. Kremlniñ kontroli altında olğan Qırım ukümeti, de facto ğayıp oluv vaqialarını tanıy, lâkin olarğa özüniñ alâqası olğanını inkâr ete.
