Qırımtatar milliy areketiniñ faaliyetçileri Han sarayını Qırımnıñ Rusiyege tabi ukümeti tarafından yapılğan «restavratsiya işleri»nden qorçalamaq ricası ile UNESCOğa berilecek muracaat tübünde imzalar toplaylar. Bunı Qırım.Aqiqatqa qırımtatar milliy areketiniñ veteranı Zevcet Kurtumerov bidrdi etti.
Onıñ malümatına köre, imzalarnıñ toplanması Qırımtatar Mlliy Meclisiniñ teşebbüsinen başlandı.
Kurtumerov: «Han sarayını restavratsiya dep yıqqanları aqqında endi bütün dünya bile. Bu işlerni çare olğanı qadar eñ qısqa vaqıtta toqtatmaq içün qırımtatarlar, UNESCOğa berilecek muracaat tübünde imzalar toplamaq qararına keldiler. Eki afta içinde biz bir qaç biñ imza toplap oldıq», – dep ikâye etti.
O, imzalarnıñ toplanması ne qadar devam etecegini bildirmedi.
Aprel 19-da Bağçasarayda «Han sarayı» kompleksiniñ kirişi yanında yarımadanıñ tamır halqına ait bu medeniy miras abidesini qorçalamaq maqsadınen ekisi de bir kişilik olğan eki piket keçti. Birinci bir kişilik piket esnasında iştirakçiniñ (Edem Ablayevniñ) yanına Rusiye polis hadimi keldi. Bundan soñ piketçiniñ tedbiri toqtatıldı. Onı, «suhbet» keçirmek içün çetke alıp kettiler. Birazdan soñ daa bir erkek, üstünde «qırımtatar tarihınıñ yoq etilmesini» toqtatmaq talabı olğan plakatnen çıqtı.
Qırımnıñ Rusiyege tabi ukümeti Bağçasaraydaki Han sarayında «qazağa qarşı ilk nevbetteki işler»ni yapmağa devam ete. Ukraina Medeniyet nazirligi, Qırımdaki Rusiye ukümeti tarafından Bağçasaray qoruğınıñ territoriyasında işlerniñ yapılması neticesinde Han sarayınıñ baş binası içün mahv etilmek telükesi bar, dep iddia ete.
Bağçasaraydaki Han sarayı muzeyi – qırımtatarlarnıñ tarihı ile alâqalı olğan eñ belli muzey, Qırımda olğan Geray hanlarına ait yazlıq rezidentiya yeri. Muzey kompleskiniñ territoriyasında saray, harem binası, han mezarlığı ve cami bulunalar. O, UNESCOnıñ Dünya mirası cedveline kirsetilmege namzettir.
