Yaltadaki «Hizb ut-Tahrir işi»niñ altı figurantınıñ menfaatını taqdim etken Qırım advokatı Emil Kurbedinov, aprel 24-te Rostovdaki Rusiye mahkemesi bu iş boyunca qabaatlavnıñ şaatlarından birini sorğulap olamadı, çünki o, «oturışuvğa kelmege qorqtı», dep bildirdi. Bunı qorçalayıcı Qırım.Aqiqat muhbirine ikâye etti.
«Akem Ekstremizmge qarşılıq kösterüv merkezinden berilgen vesiqanı oqudı. Onda, şaatnıñ devletniñ imayesi altında bulunğanı ve oturışuvlarğa kelmege qorqqanı qayd etile. Prokuror, onıñ ifadeleri sadece oqulsın, dep muracaat etti. Aynı zamanda qorçalav tarafı buña qarşı çıqtı, çünki bizim fikrimizge köre, bu istek esassızdır», – dedi Kurbedinov.
Onıñ malümatına köre, şaat, Ukraina militsiyasınıñ sabıq hadimi ola. 2006 senesinde o, sanki «Hizb ut-Tahrir teşkilâtı ile alâqalı olğan» areketler içün aq-uquq qorçalayıcısı Emir-Usein Kukuğa qarşı memuriy protokol tizgen edi.
«Yalta altılığı»nıñ diger advokatı, Edem Semedlâyev: «Amma Aqmescitteki Kyiv rayonı mahkemesiniñ, zamanı aşması sebebi ile o işniñ qapatılması aqqında qararı bar. Qorçalavnıñ fikrine köre, tahqiqatçı sadece «Hizb ut-Tahrir» sözüni körip, bundan faydalanacaq oldı. Bu şaatnıñ ne aytacağını bilmeyim, lâkin o, bu ufaq şeyni bile seslendirmege qorqtı», – dep qayd etti.
Adı bildirilmegen şaat tarafından açıq menbalarda izaat berilmedi.
Qırım.Aqiqat muhbiriniñ malümatına köre, aprel 24-te keçken mahkeme oturışuvında prokuror işniñ materiallarını, esasen mahkemelerniñ bir de-bir İslâm edebiyatı eseriniñ yasaq etilmesi ya da ekstremistik olaraq tanılması aqqında qararlarını oqudı. Nevbetteki oturışuv aprel 25, saat 10-ğa tayin etildi.
2016 senesiniñ fevral-aprel aylarında Yaltada Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk yaqalandılar. Olarnı Rusiyede yasaq etilgen «Hizb ut-Tahrir» İslâmiy siyasiy teşkilâtına alâqalı olğanlarında qabaatlaylar.
Rusiye arbiy mahkemesi Yaltadaki «Hizb ut-Tahrir işi»ni Aqmescitte keçken köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
Yanvar 24-te Ukraina Tış işleri nazirligi Rusiyeden Yaltadaki «Hizb ut-Tahrir işi» figurantınıñ azat etilmesini talap etti.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
