Link açıqlığı

Saatnıñ esas haberi

Qırımda prokuror «fevral 26 işi» figurantları içün şartlı apis müddeti istedi


Rusiyeniñ kontroli altında olğan Aqmescitteki Merkeziy rayon mahkemesinde devlet qabaatlayıcısı Dmitriy Taran «fevral 26 işi» figurantları içün üç yıllıq sınama muddeti ile azatlıqtan şartlı olaraq marum etüv şeklinde cezalav istedi. Bunı Qırım.Aqiqat muhbiri bildire.

Prokuror, Ali Asanov ve Mustafa Degermenci içün üç yıllıq sınama muddeti ile beş yılğa azatlıqtan şartlı olaraq marum etüv, Eskender Kantemirov, Arsen Yunusov ve Eskender Emirvaliyev içün üç yıllıq sınama muddeti ile 3,5 yılğa azatlıqtan şartlı olaraq marum etüv şeklinde cezalav istedi.

Munaqaşalar vaqtında qabatlayıcı, «mahkeme tahqiqatı esnasında bütün muhakeme etilgenleriniñ qabaatı tolu kölemde ibatlandı», dep bildirdi. Onıñ fikrine köre, olar episi 2014 senesi fevral 26-da Qırım parlamentiniñ divarları yanındaki kütleviy qarışıqlıqlarda iştirak etkende «Rus birligi» («Russkoye yedinstvo») teşkilâtınıñ azalarına qarşı küç qullandı.

Munaqaşalar esnasında Kantemirovnıñ advokatı Ayder Azamatov, imayesi altında olğan şahısnıñ kütleviy qarışıqlıqlarda iştirakini iç bir şaat tasdiqlamadı, zarar körgen Sergey Berbenets ise Kantemirov ile şahsiy çatışması olğanına işaret etti, dep qayd etti. Ondan ğayrı, advokat, imayesi altında olğan şahısnıñ bir de-bir kişi ile gurppa teşkil etkenine ve bir de-bir kişige qarşı küç qullanğanına iç bir delilniñ olmağanına, ve bu vaqialarnıñ devlet qabaatlavı tarafından isbatlanmağanına diqqat çekti.

Martnıñ soñunda Kremlniñ kontroli altında olğan Qırım Yuqarı mahkemesi «fevral 26 işi» figurantları Ali Asanov ve Mustafa Degermencini mayıs 7-ge qadar ev apisinde qaldırdı.

2014 senesi fevral 26-da Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün bir gruppa qırımtatar faaliyetçilerine qarşı mahkeme 2015 senesinde başlandı.

Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyevniñ işinden ayırıldı.

2017 senesi oktâbr 25-te Rusiye ukümeti Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.

XS
SM
MD
LG