Kezlevniñ suv saasında bulunğan Doñuzlav gölünden qumnıñ kontrolsiz çıqarılması, bazı balıq çeşitleriniñ bayağı azalmasına ketirecek ve kelecekte ekologik telüke doğurmaq mümkün.
Bunı «Qırım.Aqiqat TV» içün bergen izaatta Qırım ekologı Margarita Litvinenko bildirdi.
Ekolog: «Balıqlar tuhumlarını suv yosunlarında taşlay bilgen saa mahv etile. Tabiiy ki, bu balıq sayısınıñ azalmasına ketire. Bu yerde göl yanında bulunğan ekotopluluq da eksilecek. Yalılarnı lay basa. Bu aqta em Qırım ilimler akademiyası, em de cemiyetçi ekologlar tenbileyler», – dep ikâye etti.
Qırımnıñ Rusiye tarafından ilhaqından soñ Qırımnıñ 2020 senesine qadar içtimaiy-iqtisadiy inkişaf etilmesi federal maqsatlı programması çerçivesinde qurulğan obyektleriniñ ihtiyacı içün Doñuzlav gölündeki qum daa faal surette çıqarılıp başladı.
Qumnıñ kontrolsiz çıqarılması neticesinde ğarbiy yalıdaki plâjlarnıñ meydanlığı bir qaç qat eksildi. Doñuzlav gölüniñ yanındaki territoriya sahrağa çevirile. Qırım dağları ise ufatıcı tertibatlarnıñ darbeleri altında ğayıp olalar.
Yalıñız 2015 senesinde Kremlniñ kontroli altında olğan Qırım ukümeti faydalı çıqarılmalarnıñ işletilmesi içün 40-tan ziyade litsenziya berdi. 2016 senesinde ise sekizi pıçılğan qaburçaqtaş, üçü qum ve çaqıl qarışması ve ekisi qum yataqları olmaq üzre 14 yañı yataq açıldı.
