Ukraina Yuqarı Radasınıñ İnsan aqları boyunca vekiliniñ ofisi, Rusiye tarafından ilhaq etilgen Qırımda bulunğan aq-uquq qorçalayıcılarını yarımadada insan aqlarınıñ bozuluvları aqqında bildirmege davet ete.
Bunı aprel 20-de Ukraina ombudsmeniniñ matbuat hizmeti bildire.
Bildirüvde: «Qırım insan aqlarını qorçalav gruppası tarafından er ay boyunca yapılğan Qırımda insan aqları saasındaki vaziyetniñ monitoring tanıtuvları Qırım yarımadası territoriyasında muntazam surette, sistematik şekilde ve cezala körmeden yapılğan insan aqlarınıñ bozuluvları aqqında şaatlıq etkenlerini qayd etmek isteyim», – denile.
Ombudsmenniñ ofisinde, info@ombudsman.gov.ua elektron poçtası ve Kyivdeki İnsitutskaya soq., 21/8 adresi boyunca muracaatlarnı beklegenlerini qayd ettiler.
Daa evel aprel 20-de Ukraina Yuqarı Radasınıñ İnsan aqları boyunca vekili Lüdmila Denisova, Rusiyedeki zenaatdaşı Tatyana Moskalkovağa, 2018 senesiniñ aprelinde Aqmescit tahqiqat izolâtorında eñ azından dört kişiniñ ölmesi aqqında malümatnı teşkermek ricasınen mracaat etti.
Aprel 19-da «Qırım insan aqlarını qorçalav gruppası», ilhaq etilgen Aqmescitniñ tahqiqat izolâtorında dört kişiniñ tabiiy olmağan tarzda ölgenini bildirdi. Aq-uquq qorçalayıcılarnıñ sözlerine köre, olar, bu adamlarnıñ ölümi içün neler sebep olğanını bilmeyler. Lâkin olar, ölülerniñ özlerini öldürgenlerine dair tahminniñ qandırıcı olmağanını tüşüneler.
Qırımtatar Milliy Meclisiniñ reisi, Yuqarı Radanıñ deputatı Refat Çubarov, ilhaq etilgen Qırımda, içinde ekisi qırımtatar olmaq üzre dört kişiniñ ölümi munasebeti ile yardım istey.
