Yarımadada daima yaşamağan üç qırımtatarğa ilhaq etilgen yarımadanıñ territoriyasına kiriş yasaq etildi. Olarnıñ ekisi – Türkiye vatandaşı ve daa biri – Ukraina vatandaşı. Bunı Qırım.Aqiqatqa Qırım adliyecisi Elvina Semedlâyeva bildirdi.
Onıñ aytqanına köre, advokatlar yasaqlarnıñ tafsilâtlarını ögrenmege ve daa soñra buña qarşı mahkemege muracaat etmege tırışalar.
Adliyeci: «Bizge, Qırımğa kirmeleri yasaq etilgen üç qırımtatar muracaat etti. Olarnıñ ekisi – Türkiye vatandaşı, anda endi çoqtan yaşaylar. Olar Rusiye elçiliginde viza almaq istedi, lâkin olarğa, bir şey añlatmayıp ve yazılı şekilde bildirmeyip, vizanı bermediler. Daa bir kişi – Ukraina vatandaşı. Mında onıñ yaqın soyları otura. O, olarnı sıq-sıq ziyaret ete edi. Nevbetteki sefer Qırımğa kirmege istegende oña, 2048 senesine qadar Qırımğa kirmesi yasaq etilgeni aqqında yazılı bildirüvni taqdim ettiler. Onıñ kirişi FSBniñ talabı ile yasaq etildi», – dep ikâye etti.
Onıñ aytqanına köre, advokat Edem Semedlâyev, Türkiye vatandaşı olğan eki qırımtatarğa kim ve nege esaslanıp Qırımğa kirişni yasaq etkenini tayin etmek içün türlü muessiselerge (ve şu cümleden Rusiye İİNi ve migratsiya boyunca baş idarege) malümat talabı ile muracaat etti.
Ondan ğayrı, advokat, Ukraina vatandaşı olğan qırımtatarğa kirişniñ yasaq etilmesine qarşı mahkemege şikâyet bermek niyetinde.
Elvina Semedlâyevanıñ aytqanına köre, Türkiyeden olğan eki qırımtatar Qırımdaki yurtdaşlarına sıq-sıq yardım ete edi.
2014 senesi mayıs 3-te Rusiye sıñırcıları, ilhaq etilgen yarımadanıñ territoriyasına beş yıl devamında kirmesi yasaq olğanı aqqında Rusiye FSBsiniñ 2014 senesi aprel 19 tarihlı qararına sıltap, Mustafa Cemilevni yarımadağa yibermediler.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
