Ukraina Silâlı quvetleriniñ Arbiy deñiz quvetleri (SQ ADQ), Rusiye tarafından ilhaq etilgen Qırımnıñ memuriy sıñırı yanında deñız yalısınıñ mudafaası boyunca talimler keçirdi. Bunı aprel 20-de Ukraina ADQsı komandanlığınıñ matbuat hizmeti bildire.
Bildirüvde: «Qırım Muhtar Cumhuriyetiniñ vaqtınca işğal etilgen territoriyası ile memuriy sıñırnıñ yanında bir qaç kün devamında Ukraina Sqsı terkibindeki Arbiy deñiz quvetleriniñ deñiz piyadeleri komandanlığına tabi qısımları deñiz yalısını şartlı raqipniñ deñiz desantından muafaza etüv boyunca talimler keçirdi», – denile.
Telükesizlik muessisesinde, «artilleriya qısımları, şartlı raqipniñ desant gemileri ve deñiz desantını mahv etüv boyunca talim meşğuliyetlerini muvafaqiyetle becerdiler», dep qayd ettiler.
Ukraina ADQsı komandanlığında: « Öz nevbette deñiz piyadeleri şartlı raqipniñ desantı ücümini bivasta qaytaruv boyunca vazifelerni becere edi ve telükeli doğrultuvlarda qısımlar şeklinde manövr etti», – dep ilâve ettiler.
Yanvar ayında Ukraina Silâlı quvetleri terkibindeki Arbiy deñiz quvetleriniñ deñiz aviatsiyası Qara deñizde Amerika Qoşma Ştatları Arbiy deñiz quvetleriniñ USS Garney (DDG 64) gemisi ile birlikte ortaq talimler keçirdi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
