Aprel 19-da Bağçasarayda Han sarayınıñ binası yanında bir kişilik piketniñ iştirakçisi Edem Ablayev saraynıñ şimdiki rekonstruktsiyasını toqtatmağa davet etti.
Ablayevniñ izaatları ile videonı Facebookta Leylâ Yaşlavskaya derc etti.
Ablayev: «Bu tedbirniñ vaqtı endi çoqtan berli keldi. Han sarayında olğanına, tarihımıznıñ muntazam surette, adım-adım mahv etilgenine içim yana. Buña cemaatçılıqnıñ, yerli akimiyetniñ diqqatını celp etmek isteyim. Çünki bu, tarihımıznıñ yoq etilmesinden başqa bir şey degil. Ve menim fikrimce, bu qasten yapıla», – dep qayd etti.
O, rekonstruktsiyağa alâqası olğanlardan yapqan işleri içün mesüliyetke çekilüv aqqında tüşünmelerini ve «böyle bir vandalizmni toqtatmalarını» talap etti.
Ablayev: «Cinayet içün er vaqıt cevap bermek kerek ola. Lâkin eñ yahşısı şimdi, daa büyük bir belâlarğa sebep olmağance, qırımtatar halqına çoq zarar ketirmegence aqılnı başqa toplamaq ve, vandalizmden vazgeçip, yalıñız bu ceryanğa celp etilgenlerniñ küçü ile degil de, aynı zamanda halqara teşkilâtlarnıñ yardımı ile şuurlı bir tarihımıznı saqlav ceryanına, kerçek restavratsiyağa keçmek. Bilgeniñiz kibi Han sarayı boyunca endi UNESCOnıñ qararı bar. Men er kesni maña qol tutmağa ve, bütün imkânlı olğan usullarnı qullanıp, bu vandalizmni toqtatmağa davet etem», – dedi.
Ablayevniñ aytqanına köre, piket vaqtında yanına kelgen uquqqoruyıcı organlarınıñ hadimi, şahsiyetini tayin etmeknen sıñırlandı.
Ablayev: «Narazılığım, qanun bozmaq teşebbüsi degil edi. Narazılığımnıñ maqsadı – şahsen özüme degil de, Han sarayına diqqat çekmek. Añlağanım qadar, tamam bu sebepten polis hadimi, sözde, iç bir qanun bozuluvını tayin etmedi. Menden yalıñız izaatlar aldı. Bunıñle sağlıqlaştıq», – dep añlatti.
Aprel 19-da Bağçasarayda «Han sarayı» kompleksiniñ kirişi yanında yarımadanıñ tamır halqına ait bu medeniy miras abidesini qorçalamaq maqsadınen ekisi de bir kişilik olğan eki piket keçti. Birinci bir kişilik piket esnasında iştirakçiniñ (Edem Ablayevniñ) yanına Rusiye polis hadimi keldi. Bundan soñ piketçiniñ tedbiri toqtatıldı. Onı, «suhbet» keçirmek içün çetke alıp kettiler. Birazdan soñ daa bir erkek, üstünde «qırımtatar tarihınıñ yoq etilmesini» toqtatmaq talabı olğan plakatnen çıqtı
Qırımdaki Rusiye ukümeti Bağçasaraydaki Han sarayında «qazağa qarşı ilk nevbetteki işler»ni yapmağa devam ete. Ukraina Medeniyet nazirligi, Qırımdaki Rusiye ukümeti tarafından Bağçasaray qoruğınıñ territoriyasında işlerniñ yapılması neticesinde Han sarayınıñ baş binası içün mahv etilmek telükesi bar, dep iddia ete.
Bağçasaraydaki Han sarayı muzeyi – qırımtatarlarnıñ tarihı ile alâqalı olğan eñ belli muzey, Qırımda olğan Geray hanlarına ait yazlıq rezidentiya yeri. Muzey kompleskiniñ territoriyasında saray, harem binası, han mezarlığı ve cami bulunalar. O, UNESCOnıñ Dünya mirası cedveline kirsetilmege namzettir.
