Qırımdaki Rusiye baş naziriniñ muavini Georgiy Muradov, yarımadanıñ ukümeti Ğarpnıñ sanktsiyalarını atlamaq içün kriptovalütanı qullanmaq mumkün, dep iddia ete.
Onıñ aprel 18-de jurnalistlerge bildirgenine köre, bu munasebet ile yarımadada «kriptovalüta yatırım fondu»nı meydanğa ketirmek ğayesi muzakere etile.
«Krıminform»: «Biz sanktsiyalarnı atlama yollarını muzakere etemiz. Bunıñ yollarından biri – Qırımda kriptorvalüta yatırım fondunıñ meydanğa ketirilmesidir. Onda biz kriptovalüta resurslarını toplap ve itibariy, yani adiy parağa çevirip, Qırım toprağında er angi yatırım leyhaları içün qullana bilecekmiz», – dep, Muradovnıñ sözlerini naqil ete.
Kütleviy haber vastalarında naqil etilgen sözlerine köre, «Qırımda iqtisadiy inkişafnıñ ananeviy usulları çalışmay, ve yañı variantlarnı qıdırmaq kerek».
Mart ayında Kremlniñ kontroli altında olğan Qırım ukümeti apparatınıñ sabıq hadimleri, « qanunsız olaraq kriptovalütanı elde etkenleri içün» cöremege mahküm etildi. Qırım memurları, 2016 senesiniñ sentâbrinden 2017 senesiniñ yanvarine qadar ukümet binasında bulunıp, bitkoinlerni elde ete ediler.
Kriptovalüta bu, raqamlı (virtual) valütadır. Şimdi kriptovalüta ve şu cümleden eñ keniş tarqalğan bitkoin Ukrainanıñ qıtadaki qısmında belli bir uquqiy statusqa malik degil. 2017 senesiniñ ağustosında Ukrainanıñ Milliy bankında, bitkoinlerniñ uquqiy statusını doğrulamaq niyetleri aqqında bildirdiler.
Qomşu Rusiye ve onıñ tarafından ilhaq etilgen Qırımda kriptovalütalarnıñ statusı şimdilik qanuniy ceetten doğrulanmadı.
Soñki vaqıtta bir çoq devletniñ ukümetleri kriptovalütalar bazarınıñ regulirlenmesi içün çareler köreler. Bu qararlar alınırken yanvar ayında bitkoinniñ fiyatı birden bayağı eksildi. 2018 senesi dekabriniñ ortasında bitkoin 20 biñ dollar turğan olsa, yanvarde o, eki kere 10 biñ dollardan aşağı tüşken edi.
