Link açıqlığı

Saatnıñ esas haberi

Roskomnadzornıñ başlığı Facebooknıñ blok etlmesini imkânlı saya


Roskomnadzor 2018 senesiniñ soñuna qadar Facebook içtimaiy ağını teşkerecek ve, o vaqıtqa qadar Rusiye ukümetiniñ talapları yerine ketirilmese, resursnıñ blok etilmesi meselesi ortağa çıqmaq mumkün. Bunı muessiseniñ rehberi Aleksandr Jarov, Rusiyeniñ «İzvestiya» gazetası içün bergen intervyüde bildirdi.

Memur, 2018 senesiniñ soñuna qadar şirket tarafıdan «yerine ketirilmek kerek» olğan maddelerni sayıp çıqtı. Olarnıñ arasında: Rusiye vatandaşlarınıñ şahsiy bilgiler bazalarını Rusiye territoriyasında yerleştirilmesi, yasaq etilgen malümatnıñ alıp taşlanması ve, ondan ğayrı, «diger qanunlarğa riayet etüv». Jarov, bu cedvelden er angi madde yerine ketirilmese, ya da Rusiye devleti böyle areketni yapmaq niyeti aqqında haberdar etilmese, Facebook blok etile bilir, dep qayd etti.

Jarov, Telegram messenceriniñ blok etilmesi ile alâqalı vaziyetni izalarken, muessisede «bütün internetni yıqtırmaq» planları olmağanını bildirdi.

Rusiyede Telegram, FSBge qullanıcılarnıñ yazışmalarını şifrlemek içün işletilgen anahtarlarnıñ berilmesini red etkeni içün blok etildi. Aprel 16-da Roskomnadzor Telegram ile bağlı olğan Amazon ve Google şirketleriniñ IP-adreslerini blok etmege başladı. Bunıñ neticesinde yüzlerce onlayn-servis zarar kördi.

IP-adreslerniñ kütleviy surette blok etilmesi sebebinden qararnen 60 Rusiye şirketi uquqiy yardım almaq içün «Agora» aq-uquq qorçalayıcıları gruppasına muracaat etti. Şimdi zarar körgen serverlerniñ saipleri körgen zararlarına qıymet kese ve mahkemege muracaat etmek imkânını ögreneler.

XS
SM
MD
LG