Aprel 16-da Amerika Qoşma Ştatları, Rusiye ukümeti tarafından qol tutuv körgen hakerler, kibercasuslıq kampaniyası çerçivesinde bütün dünyadaki bilgisayar routerlerini virus ile bulaştırdı, dep beyan ettiler. Bunı Azatlıq Radiosı bildire.
Vaşington ve Londonda, bu kampaniyanıñ devlet teşkilâtları, işhaneler ve infrastrukturanıñ eñ muim operatorlarına qarşı doğrultılğanını iddia eteler.
Beyaz evniñ kibertelükesilik boyunca koordinatorı Rob Coys, kiberboşluqta Kreml ya da diger devlet subyektleri tarafından olğan suiqastçılar AQŞ tarafından qarşılıq körecekler, dep ilân etti.
Büyük Britaniyanıñ kibertelükesizlik ve alâqa meseleleri boyunca kâtibiniñ muavini Janett Manfra: «Rusiye ukümetiniñ faaliyeti bizim kibertelükesizligimiz içün telüke doğurmağa devam ete. Bütün mesuliyetli devletlerni, Rusiyeniñ kibertelükesini yeñmek içün öz resurslarını ve şu cümleden diplomatik, uquqqoruyıcı, tehnikiy ve diger vastalarını qullanmağa davet etemiz», – dedi.
Bu, Rusiyege qarşı, hakerlerniñ Moskvanıñ menfaatı içün çalışqanında birinci qabaatlav degil. Ayrıca, mart 23-te Ukraina Telükesizlik hizmeti (SBU), Kyivde «Kremlniñ tarafını tutqan hakerler» ofisiniñ faaliyetini açıqqa çıqarğanını bildirdi.
SBUnıñ matbuat hizmetinde, «FSBniñ kontroli altında olğan haker gruppirovkası, cümleden, kritik infrastruktura, devlet ve bank muessiselerine kiberucümler teşkil ete edi», dep iddia eteler.
Rusiye tarafı SBUnıñ bu bildirüvini izalamadı.
2017 senesiniñ yazında Ukrainada bir qaç haker ucümi, ve şü cümleden iyünde, başta Petya.A (daa soñra – NotPetya) dep adlandırılğan virusnıñ qullanılması ile kiberucüm yapıldı.
2018 senesiniñ fevralinde Beyaz ev Rusiye arbiylerini, 2017 senesiniñ iyüninde NotPetya virusnıñ qullanılması ile tarihta eñ büyük kiberucümniñ yapılmasında qabaatladı. Lâkin Moskvada bu ucümge alâqadar olğanlarında qabaatlavnı «delilsiz ve esassız» deyler.
